Kur 3-vjeçari Aylan Kurdi u gjet i pajetë në breg të detit, e gjithë bota u trondit dhe shpresoi që një gjë e tillë të mos përsëritej më. Por, katër muaj më vonë, një tjetër fëmijë pati fatin e Aylan-it.
Ditën e të shtunës, 39 emigrantë humbën jetën gjatë tentativës për të shkuar nëpërmjet detit nga Turqia në brigjet e ishullit grek Lesbos. Ky është itinerari që ndjekin emigrantët sirianë me qëllimin që të futen në vendet e Bashkimit Europian. Sipas policisë turke, barka e cila mbante rreth 120 refugjatë, është përplasur me shkëmbinj nënujorë dhe ka filluar të fusë ujë. Një pjesë e tyre kanë arritur të mbijetojnë pasi janë hedhur në det dhe kanë notuar drejt bregut turk, nga i cili ishin nisur. Pjesa tjetër që ka mbetur mbi barkë, midis të cilëve dhe fëmija i gjetur, nuk kanë arritur të shpëtojnë.
“Ne dëgjuam britma të tyre dhe kur arritëm në breg, trupat filluan të dilnin ngadalë nga uji. U munduam t’i mbulonim dhe të shpëtonim aq sa mundnim”, ka thënë një nga banorët e zonës afër me vendngjarjen.
Burimi: Daily Mail / Përshtati: Ergisa Bejkollari
