Irani lëshon një valë të re sulmesh me raketa mbi Izraelin
Irani ka lëshuar një tjetër valë raketash ndaj Izraelit në orët e para të së hënës, duke shkaktuar panik në të gjithë vendin. Shërbimet emergjente raportuan goditje direkte dhe rënie të copëzave të raketave në veri dhe në qendër të Izraelit, duke lënë të plagosur të paktën 67 persona.
Autoritetet në qytetin Petah Tikva, pranë Tel Avivit, thanë se një ndërtesë banimi u godit nga një raketë iraniane, duke shkaktuar dëme të shumta.
Ende nuk ka një bilanc të saktë viktimash nga ky sulm, pasi ekipet e shpëtimit po vijojnë kërkimet në rrënoja.
Që nga e premtja, kur Izraeli nisi sulmet e para ndaj Iranit, mbi 230 persona janë raportuar të vrarë në të dy vendet, ndërsa konflikti mes tyre po vijon.
Dhjetëra mijëra protestues në Hagë kundër politikave të qeverisë për Gazën
Të dielën, dhjetëra mijëra protestues të veshur me rroba të kuqe marshuan në qytetin e Hagës në një protestë masive kundër politikës së qeverisë holandeze për konfliktin në Gaza.
I quajtur “Protesta e Vijës së Kuqe”, ky ishte manifestimi i dytë i këtij lloji në kryeqytetin politik të Holandës dhe tejkaloi për nga pjesëmarrja protestën e muajit maj.
Marshuesit përshkuan një itinerar prej 5 kilometrash rreth qendrës së qytetit, në një përpjekje simbolike për të krijuar një "vijë të kuqe" që qeveria sipas tyre nuk ka pasur guximin ta kalojë për t’i dhënë fund ofensivës izraelite në Gaza.
Trump parashikon marrëveshje midis Iranit dhe Izraelit
Presidenti amerikan, Donald Trump, parashikoi të dielën se “Irani dhe Izraeli do të arrijnë një marrëveshje”, duke shtuar se “po zhvillohen shumë thirrje dhe takime”.
Ai përmendi ndërmjetësimet e mëparshme si një shembull suksesi, përfshirë rastin e fundit mes Indisë dhe Pakistanit, për të cilin pretendon se ka ndërhyrë përmes presionit tregtar për të ulur tensionet.
“Iranit dhe Izraelit do t'u duhet të arrijnë një marrëveshje, dhe do ta bëjnë, ashtu siç ndodhi me Indinë dhe Pakistanin, falë ndërhyrjes sime tregtare,” shkroi Trump.
Protesta kundër turizmit në Europën Jugore
Mijëra protestues dolën në rrugët e qyteteve të ndryshme në Europën Jugore të dielën për të shprehur pakënaqësinë ndaj fluksit turistik.
Në Barcelonë, ku u zhvilluan protestat kryesore, disa protestues spërkatën me ujë vitrinat e dyqaneve dhe ndezën tymuese.
Protestuesit thonë se turizmi i pakontrolluar po rrit çmimet e banesave dhe po i zhvendos banorët nga lagjet e tyre. Sipas një sondazhi në maj, çështja e strehimit është shqetësimi kryesor kombëtar për qytetarët në Spanjë.
Rreth 120 grupe, përfshirë sindikatat e qiramarrësve dhe organizata si Zeroport (kundër zgjerimit të aeroportit të Pratit), iu bashkuan marshimit. Sipas Zeroport, nëse ky projekt aprovohet, aeroporti do të presë edhe 15 milionë pasagjerë të tjerë, shumica dërrmuese turistë.
