Të premten mbrëma, në Charlotteville Virginia, qindra njerëz nisën marshimin nga Universiteti i Virginia-s me pishtarë në duar, duke bërtitur slogane si “jetët e të bardhëve kanë rëndësi,” “gjak dhe tokë” dhe "hebrejtë nuk do të na zëvendësojnë. Fraza e parë është një përdredhje raciste e një fraze për të drejtat e komunitetit afrikano –amerikan, ndërsa e dyta një slogan i vjetër nazist, që nënkupton gjak të pastër dhe trashëgimi të tokës. E treta, një shprehje anti-semitike.
Protestuesit supremacistë të së djathtës u përfshinë në përleshje të dhunshme me demonstruesit anti-racistë dhe anti-fashistë. Marshimi kishte qëllim fillestar protestimin e zhvendosjes së statujës së gjeneralit Robert E. Lee dhe është quajtur një prej marshimeve më të mëdha supremaciste të kohëve të fundit.
Kulmi i përleshjeve arriti në momentin që një 20-vjeçar përplasi me makinë trumën përpara tij duke lënë të vdekur një grua 32-vjeçare. 35 njerëz të tjerë pësuan plagë të lehta dhe 19 u dërguan në spitalet e zonës.
Figurat politike të vendit janë shprehur të neveritur nga veprimet dhe ideologjitë e marshuesve. Gurvernatori i Virginia-s tha se: “Është e drejta e çdo amerikani të shprehë ideologjitë e tij. Por është gjithashtu e drejta e çdo amerikani të mos u kushtojë më shumë vëmendje se ç’duhet këtyre ideologjive.”
Në të njëjtën linjë u shpreh edhe kryebashkiaku i Charlotteville: “Nën amendamentin e parë të gjithë kanë të drejtën të shprehin paqësisht mendimet e tyre, dhe si rrjedhim ja ç’mendoj unë: Jam i neveritur dhe i pështirosur nga veprimet intimiduese në një kampus universiteti.”
Burime: Al Jazeera & Bustle
