Ka diçka magjike (për të mos thënë qesharake) në mënyrën se si disa personazhe të njohur arrijnë të flasin pa thënë absolutisht asgjë. Dhe në këtë lojë të fjalëve boshe, Ledri Vula nuk është më thjesht pjesëmarrës - është i diplomuar me medalje ari.
Me një buzëqeshje simpatike, ca fjali të mjegullta dhe një “jam mirë” që mund të përkthehet në 57 mënyra të ndryshme, arrin të krijojë një PR shield që të gjithë ekspertët do ta kishin zili.
Heshtje strategjike. Rrëfim i kontrolluar. Kaq mjafton që rrjeti të ziejë. Tani, ta zbërthejmë pak nga pak.
Së pari, Ledri & Xhensila. Janë? S’janë? Janë “ekip”? Apo ndoshta vetëm “ekip” me kimi që zakonisht ndodh kur bashkohen dy njerëz të bukur dhe të famshëm?
Pyetje pas pyetje në podkastin e Alketa Vejsiut, Ledri arriti t’i ikë çdo pyetjeje me një mjeshtëri që do ta bënte çdo politikan ta kishte zili. “Jam mirë,” tha kur u pyet nëse është single. Jo “po”, jo “jo”, thjesht “jam mirë” – që në gjuhën e PR-it do të thotë: “S’dua të flas tani, se klikimet po shtohen”.
Të njëjtën energji mund ta kishte mbajtur edhe për rastin Sara Hoxha - ish-partnerja, nëna e vajzës së tij. Por ja ku ndryshon loja:
Kur pyetet për Xhensilën, është si një diplomat i Kombeve të Bashkuara: i matur dhe i kujdesshëm.
Kur vjen puna te Sara - për të cilën s’ka asnjë konfirmim, deklaratë apo prononcim publik - ai vendos të flasë lirshëm për "lumturinë e saj me atë djalin". Kjo fjali është fjali klasike nga koleksioni “Nuk është puna ime, por po e komentoj gjithsesi”.
Për veten: heshtje, mister, përgjigje enigmatike.
Për të tjerët: “update” publik mbi gjendjen sentimentale.
Ledri, vetë e ruan privatësinë si të ishte kod bankar zviceran, por jetën e ish-partneres e shpërndan sikur po bën storytelling për ndonjë dokumentar në Netflix. Coming soon: “Love life of my ex - Narrated by me.”
Dhe e kuptojmë, është baba, do të jetë i përfshirë në jetën e vajzës, e do mirëqenien e saj. Bravo! Por ka një detaj të vogël që ndryshon gjithë lojën: Sara nuk ka folur. Nuk ka konfirmuar. Nuk ka postuar as një story, as një emoji. Asgjë.
Nëse ajo s’ka folur vetë, pse ndihesh i autorizuar ta bësh ti, Ledri? Për qejf? Për pikë bonus në publik? Apo sepse s’do të të kundërshtojë dot live me një “prit pak, kush të kërkoi të flasësh për mua?”
Pra, si përmbledhje: Po, privatësia është e rëndësishme. Por jo vetëm kur të takon ty.
Ledri, ti je mirë, ne e morëm vesh. Tani lëri të tjerët të jenë mirë dhe ta tregojnë vetë historinë e tyre - kur dhe nëse e ndjejnë. Pa nevojë për zëdhënës jozyrtarë.
– Shkruar nga Sindi, kryeredaktore e Anabel, e cila nuk është aspak e surprizuar nga "jam mirë"-at pas të cilave fshihen tregime të sajuara për klikime.
-
Ledrit iu bënë 5+ pyetje për Xhensilën dhe ja si u përgjigj o.O
13 Korrik, 10:02 -
Ledri Vula flet për romancën e Sara Hoxhës dhe Erik Fullanit
13 Korrik, 09:28
