Katër të vrarë në një të shtënë masive në një godinë në Manhattan
Të paktën katër persona, përfshirë një oficer policie jashtë detyrës, u vranë të hënën kur një person hapi zjarr në një ndërtesë zyrash në Midtown Manhattan.
Autori, i dyshuar u identifikua si Shane Tamura nga Nevada, vrau veten pas ngjarjes.
Tamura, që jetonte në Las Vegas dhe kishte udhëtuar me makinë drejt New York-ut, besohet të ketë vepruar i vetëm. Hetimet për motivin janë ende në vazhdim.
Disa persona të tjerë mbetën të plagosur, sipas autoriteteve.
Trump: Gaza po përjeton “uri të vërtetë”
Presidenti amerikan, Donald Trump, deklaroi të hënën se Gaza po përjeton “uri të vërtetë”, duke i bërë thirrje Izraelit që të sigurojë ushqim për popullin, në atë që u duk si një ndryshim i tonit të tij ndaj krizës humanitare në Rripin e Gazës.
Duke folur nga Skocia, Trump tha se SHBA dhe vende të tjera po dërgojnë para dhe ushqime në Gaza, por se Kryeministri izraelit Benjamin Netanyahu duhet “ta menaxhojë situatën”.
“Dua të sigurohet që ata të marrin ushqimin,” tha Trump.
Komentet e tij erdhën pas publikimit të imazheve tronditëse të fëmijëve të uritur në Gaza, që kanë rikthyer vëmendjen ndërkombëtare mbi përkeqësimin e krizës së urisë në territorin palestinez.
Përleshje në Rodos gjatë protestës kundër luftës në Gaza
Përplasje mes policisë dhe protestuesve shpërthyen të hënën në ishullin grek të Rodosit, gjatë një proteste kundër luftës në Gaza, ndërsa një anije turistike izraelite ishte ankoruar në port, raportojnë mediat lokale.
Pamjet televizive treguan një grup të vogël protestuesish që brohorisnin “Liri për Palestinën” pranë portit, ndërsa policia ndërhyri për t’i neutralizuar, duke shkaktuar përplasje mes tyre.
Pasagjerët e anijes turistike, kryesisht shtetas izraelitë, zbritën në ishull pa incidente, sipas mediave greke.
Tajlanda akuzon Kamboxhën për shkelje të armëpushimit në kufi
Tajlanda akuzoi Kamboxhën se ka shkelur në mënyrë të qëllimshme armëpushimin që të dy vendet kishin rënë dakord të hënën për t’i dhënë fund përleshjeve kufitare që kanë shkaktuar të paktën 33 viktima dhe kanë zhvendosur mijëra banorë.
Armëpushimi, i arritur pas pesë ditësh bombardimesh dhe sulmesh me raketa, duket se po përballet me sfida të menjëhershme.
Ushtria tajlandeze deklaroi se kishte ndalur zjarrin pas mesnatës, por se kishte vijuar të sulmohej nga pala kamboxhiane “në disa pika” deri në orët e mëngjesit.
Ndërkohë, Ministria e Mbrojtjes e Kamboxhës i tha agjencisë AFP se “nuk ka pasur përleshje të armatosura” që nga hyrja në fuqi e armëpushimit.
