Qeveria talebane ka hequr nga sistemi universitar të gjitha librat e shkruar nga gratë, si pjesë e një nisma ligjore që përfshin gjithashtu ndalimin e mësimdhënies për të drejtat e njeriut dhe çështjet e ngacmimit seksual.
Rreth 140 libra të shkruar nga gra janë mes 680 titujve të cilët janë klasifikuar si “problematikë”, për shkak të përmbajtjes së tyre që konsiderohet në kundërshtim me Sheriatin dhe politikat e talebanëve.
Universitetet janë njoftuar gjithashtu se 18 lëndë nuk lejohen më të jepen, pasi sipas një zyrtari taleban, “bien ndesh me parimet e Sheriatit dhe qëndrimet politike të sistemit”.
Ky është vetëm vendimi më i fundit në një varg të gjatë kufizimesh që talebanët kanë vendosur që nga rikthimi i tyre në pushtet katër vjet më parë.
Vetëm këtë javë, në të paktën 10 provinca është ndaluar rrjeti i fibrave optike, me urdhër të udhëheqësit suprem taleban, me arsyetimin se ky veprim do të ndihmonte në “parandalimin e imoralitetit”.
Këto kufizime kanë ndikuar ndjeshëm në jetën e përditshme të grave dhe vajzave në Afganistan. Atyre u ndalohet të ndjekin shkollën pas klasës së gjashtë, dhe kurset e mamive, një nga fushat e pakta të lejueshme më parë, u ndërprenë në fund të vitit 2024.
Tani, edhe programet universitare që lidhen me gratë janë në shënjestër. Nga 18 lëndët e ndaluara, gjashtë kanë të bëjnë drejtpërdrejt me çështje gjinore, si “Gjinia dhe Zhvillimi”, “Roli i Grave në Komunikim” dhe “Sociologjia e Grave”.
Pavarësisht kësaj, qeveria talebane vazhdon të pretendojë se “respekton të drejtat e grave” në përputhje me interpretimin e saj të ligjit islamik dhe kulturës afgane.
Një anëtar i komitetit të vlerësimit të librave universitare e konfirmoi ndalimin për BBC Afghan, duke thënë se “të gjithë librat e shkruar nga gratë nuk lejohen më të përdoren për mësim”.
Udhëzimet e reja janë lëshuar në fund të muajit gusht, dhe vijnë nga një komitet i përbërë nga “studiues dhe ekspertë fetarë”, sipas një letre nga Ministria e Arsimit të Lartë e qeverisë talebane.
Përveç librave të grave, ndalimi prek edhe libra të autorëve iranianë. Një anëtar i komitetit tha se qëllimi është “të ndalohet infiltrimi i përmbajtjes iraniane” në sistemin arsimor afgan.
Një listë prej 50 faqesh e shpërndarë universiteteve përmban 679 tituj, nga të cilët 310 janë shkruar nga autorë iranianë ose janë botuar në Iran.
Burime të ndryshme konfirmuan për BBC Afghan se ndalimi është pjesë e përpjekjeve për të frenuar ndikimin kulturor dhe ideologjik të Iranit në Afganistan.
