
Ndërsa rrjetet sociale janë ende të zëna me fotot e fejesës së Taylor Swift me Travis Kelce, një tjetër emër ka tërhequr vëmendjen në mënyrë më të heshtur, por jo më pak të qartë: Kayla Nicole, ish-e dashura e Travis Kelce, ka dhënë një reagim tërthor, por mjaft të kuptueshëm në Instagram.
Kayla Nicole është gazetare sportive dhe modele nga SHBA, e cila ka qenë në një lidhje të gjatë me yllin e NFL, Travis Kelce, nga viti 2017 deri në vitin 2022, me disa ndarje dhe ribashkime gjatë rrugës. Pas përfundimit të lidhjes, Travis nisi të dilte me Taylor Swift në vitin 2023, një histori që nga një flirt në koncert u kthye në një nga romancat më të ndjekura të dekadës.
Vetëm pak ditë pasi Taylor dhe Travis publikuan fotot e propozimit romantik në një kopsht me trëndafila dhe një unazë diamanti të dizajnuar nga vetë Travis Kelce, Kayla Nicole postoi një video në Inststory ku shihet duke bërë stërvitje intensive. Ajo shkroi mbi video:
“Qëllimi? Një shpinë që thotë: boll luajte me mua.”
Edhe pse nuk u përmendën emra, koha e këtij postimi dhe mesazhi flasin vetë. Dy ditë më parë, Kayla Nicole ndau gjithashtu një video të aktores Tracee Ellis Ross, e cila fliste për rëndësinë e gëzimit si një ndjenjë që kërkon përkushtim dhe nuk është aq sipërfaqësore sa lumturia e përkohshme.
“Gëzimi është një perspektivë,” thoshte Ross në video.
Por ndërsa mesazhet e saj përpiqen të jenë frymëzuese dhe pozitive, nuk mund të mohohet se në sfond ka një valë emocionesh të pathëna. Në një intervistë në podcast-in e saj personal “Pre-Game” në maj, Kayla pranoi se ndonjëherë, kur ish-i yt lidhet me dikë tjetër, është e vështirë të pranosh që ajo mund të jetë “e zonja, e bukur dhe nuk ka asgjë të keqe aty.”
Një koment që në dritën e lidhjes dhe fejesës së Travis Kelce me superyllin e muzikës botërore, taylor Swift, merr një tjetër ngjyrim.
Travis Kelce, për ata që nuk ndjekin futbollin amerikan, është një nga emrat më të spikatur të NFL-it, i njohur për suksesin në fushë dhe jetën personale jashtë saj. Kur nisi lidhjen me Taylor Swift, shumë e panë si një kombinim të pamundur, por sot, me një unazë diamanti në dorën e këngëtares dhe me miliona fansa që brohorasin, duket se kjo histori do të jetë vërtet #endgame.
Burimi: Page Six