Paralajmërim: artikulli përmban përshkrime të dhunshme
Sami al-Saei, një gazetar palestinez dhe i burgosur i liruar gjatë verës së vitit 2025, ka rrëfyer se si është përdhunuar nga rojet izraelite pas mbërritjes së tij në burgun famëkeq Megiddo të regjimit.
Sami al-Saei tregon se gjatë përdhunimit dëgjoi rojet izraelite duke qeshur, përpara se ta linin të shtrirë në dysheme me sy të mbuluar dhe duar të lidhura për të bërë një pushim e për të pirë një cigare. Një prej rojeve kuptoi se po kryhej një krim dhe ndërhyri, jo për të ndaluar torturën, por për të mos lejuar dokumentimin e saj. Al-Saei e dëgjoi atë duke thënë: “Mos bëni foto, mos bëni foto” gjatë abuzimit.
Ai pati gjakderdhje për më shumë se tre javë pas përdhunimit, që ndodhi pak pas arrestimit të tij në shkurt të vitit 2024. Ai përshkruan torturë seksuale që zgjati më shumë se 20 minuta, me goditje në vithe, presion të fortë mbi organet gjenitale dhe penetrim anal me dy objekte të ndryshme.
“U përpoqa t'i pengoja duke shtrënguar muskujt, por nuk mundesha. Ishte tmerrësisht e dhimbshme. Nuk di sa fort kam bërtitur,” tha ai.
Pas torturës, ai u rrëzua dy herë nga pafuqia kur urdhërohej të ngrihej dhe të ecte dhe nuk mori asnjë trajtim mjekësor në qelinë e mbipopulluar. Ai u detyrua të përdorte copa lecke tualeti për të ndaluar gjakun. Sami al-Saei, 47 vjeç dhe baba i gjashtë fëmijëve, u mbajt pa akuza ose gjyq deri në qershor të vitit 2025.
Rreth 40 ditë pas lirimit, ai postoi një video në TikTok duke treguar sulmin, duke sfiduar stigmatizimin social dhe paralajmërimet izraelite kundër publikimit të abuzimeve në burgje.
“Nuk mund të heshtja. Kam një përgjegjësi morale të tregoj çfarë më ndodhi dhe çfarë iu ndodh të tjerëve të burgosur,” tha ai.
Dhuna seksuale e gjerë dhe ekstreme në burgjet civile dhe ushtarake izraelite është dokumentuar nga dëshmitarë vendas dhe ndërkombëtarë, duke përfshirë mjekë, prokurorë ushtarakë izraelitë dhe Komitetin e OKB-së për Torturën. Organizata B’Tselem përshkroi një “model të rëndë dhune seksuale në burgje”, që përfshin kërcënime me sulme seksuale, zhveshje të detyruar, goditje ndaj organeve gjenitale, përdorim të qenve dhe penetrim anal me objekte të ndryshme.
Një zëdhënës i shërbimit të burgjeve izraelite e mohoi raportin, duke thënë se të gjithë të burgosurit mbahen në mënyrë ligjore dhe marrin kujdesin mjekësor që u nevojitet.
Rrëfime të tjera të tmerrshme
41-vjeçari Tamer Qarmut u arrestua në nëntor të vitit 2023 gjatë një bastisjeje në spitalin Kamal Adwan në veri të Gazës. Ai tregoi se në 24 orët e para u akuzua si militant, edhe pse kishte një dëmtim të këmbës që e kishte bërë të paaftë fizikisht që në adoleshencë. Ai u rrah rëndë, u sulmua nga një qen dhe u përdhunua nga një ushtar që përdori një shkop druri. Ai mbeti i burgosur për pothuajse dy vjet, pa u gjykuar, dhe u lirua në tetor të vitit të kaluar nën një marrëveshje të ndërmjetësuar nga presidenti amerikan Donald Trump.
Raporti i B’Tselem tregon se pas 7 tetorit 2023, qendrat e paraburgimit u kthyen në një rrjet “të dedikuar për abuzimin e të burgosurve si politikë shtetërore”, ku tortura është bërë normë. Dhuna përfshin edhe shok elektrik, gaz lotsjellës, djegie me lëngje të nxehta ose cigare dhe përdorimin e qenve për sulm ndaj të burgosurve.
Të burgosurve shpesh u mohohet kujdesi mjekësor, duke shkaktuar dëme të pakthyeshme, përfshirë amputime, humbje të shikimit dhe dëgjimit, dhe humbje jete. Të dhënat zyrtare tregojnë se të paktën 98 palestinezë kanë vdekur në burgjet izraelite që nga 7 tetori 2023, dhe numri real mund të jetë më i lartë.
Kushtet çnjerëzore dhe mungesa e mbikëqyrjes
Deri në janar të vitit 2026, Izraeli mbante rreth 9,000 palestinezë nga Gaza, Bregu Perëndimor dhe Jeruzalemi Lindor, rreth gjysma pa akuza ose gjyq. Të burgosurit përballen me uri, mbipopullim dhe mungesë higjiene. Vizitat e Kryqit të Kuq Ndërkombëtar u ndaluan që nga tetori i vitit 2023 dhe të burgosurit nuk kanë kontakt me familjet ose lajme nga jashtë.
Sami al-Saei ka paguar një çmim të lartë për të folur: ai u detyrua të zhvendosej larg komunitetit që e gjykonte nevojën e tij për të folur hapur për torturën e përjetuar në burgjet izraelite, ka pasur vështirësi për të gjetur punë dhe përndiqet nga mendime të tmerrshme për të ardhmen e fëmijëve të tij.
Por ai nuk pendohet për vendimin e të qenit zëri i atyre që nuk mund të flasin: “Ishte zgjedhja ime,” tha ai, duke shtuar se gjatë 16 muajve në burg, shumë të tjerë gjithashtu janë sulmuar seksualisht.
Burimi: The Guardian
