Nëna e kamikazit Ibrahim Abdeslam, që hodhi veten në erë në Paris, 2 vëllezërit e të cilit akuzohen gjithashtu si të dyshuar, ka thënë se djali i saj 'nuk kishte qëllim të vriste askënd' dhe se familja e tij beson se ai hodhi veten në erë për shkak të 'stresit'.
31- vjeçari Ibrahim Abdeslam shpërtheu jelekun e tij vetëvrasës jashtë kafenesë Comptoir Voltaire në natën e së premtes, por nuk vrau askënd tjetër përveç vetes. Vëllai i tij Mohammed u arrestua në Bruksel të shtunën dhe vëllai i tretë, Salah, është njeriu më i kërkuar për momentin në Europë, pasi është bërë subjekt i një urdhër arresti ndërkombëtar.
Familja Abdeslam tha se ata ishin të "habitur" që Ibrahimi hodhi veten në erë, edhe pse ai kishte kaluar kohë në Siri.
Nëna e tyre Faklan, duke folur për gazetarët me anë të nipit të saj - kushëri i të dyshuarve '- jashtë shtëpisë së familjes në Molenbeek, Bruksel, i tha portalit belg 'Het Laatste Nieuws', se ajo ishte e sigurt se ai nuk e kishte planifikuar vrasjen e askujt.
Një tjetër anëtar i familjes tha se ai nuk ka dashur të bëhej kamikaz. "Ndoshta eksplozivi shpërtheu para kohe aksidentalisht. Ndoshta arsyeja ishte stresi. Ne e pamë atë dy ditë para sulmeve. Nuk kishte asnjë shenjë se ata kishin plane për të bërë ndonjë gjë të dhunshme."
"Ne ishim me të vërtetë të befasuar që Selah ishte i përfshirë. Ibrahimi ishte ndryshe. Ne kemi vënë re se ai ishte më radikal, pjesërisht të paktën. Por jo aq shumë sa të kemi menduar ndonjëherë se ai do të kryejë një krim të tillë."
"Familja dhe unë nuk kishim asnjë ide se ata ishin në Paris. Prindërit janë me të vërtetë të shokuar. Ishte e tmerrshme për ta.
Burimi: Telegraph; Përshtati: Jolinda Levonja
