Nëse keni qenë mjaftueshëm të vëmendshëm ndaj detajeve, me siguri që mund ta keni vënë re një element jo fort rastësor në seritë e $NOB, një element që shfaqet në disa skena të rëndësishme dhe shndërrohet përsa i përket konotacionit. Shkrimtarja Gertrud von Le fort thoshte se “simbolet janë gjuha e diçkaje të padukshme” ndaj jo më kot kali është një element që spikat në serial.
Kali simbolizon gjëra të ndryshme për njerëz të ndryshëm dhe i tillë vjen edhe sa për njërin personazh për tjetrin. Në serinë e dytë, një kalë shfaqet në dhomën e Petritit dhe lidhet me të qenit pjesë e një shtrese elitare, me arritjet dhe mbi të gjitha me fuqinë. Megjithatë, në disa kultura, kali përfaqëson edhe forcën dhe shkatërrimin që vjen bashkë me të qenit në majë. Petriti, oligarku dhe njeriu më i pasur i vendit, ka padyshim shumë arritje po aq sa ka pushtet dhe forcë për të shkatërruar armiqtë apo këdo që mund t’i dalë kundër.
Në shtëpinë e Francit shihet një tjetër kalë si dekor në dhomën kur projekton me Tesën sipërmarrjen e tyre të përbashkët. Për shkak se janë përdorur si mjet transporti, kuajt janë gjithashtu simbol i përparimit, i mbërritjes diku, i hapave para. Franci, nga djali i përkëdhelur i babait deputet, djali arrogant dhe toksik kërkon që të nisë një biznes duke bashkëpunuar dhe duke ndihmuar Tesën.
E padyshim kali i Paulinit. Shumë kultura e lidhin kalin me guximin dhe personazhi i Paulinit është një figurë që e ka dëshmuar këtë. Gjithashtu kali njihet edhe si sfidues i të keqes dhe vdekjes dhe jo më kot Paulini kërkon të gjejë vrasësin e vëllait. Mirëpo pavarësisht fuqisë, në rastin e Paulinit, kali nuk është grabitqar, por pre. Pra, sado i përfshirë në biznese të paligjshme, nuk është Paulini grabitqari. Ai rrezikon të jetë preja e njerëzve që në një mënyrë ose në tjetrën kanë më shumë pushtet se ai.
Finalja e $NOB transmetohet sot, ora 20:00 në Top Channel; ritransmetimi të mërkurën, ora 23:30. Në $NOB.al mund t'i shihni seritë me titra shqip dhe anglisht, pa asnjë ndërprerje publicitare.
