Reperi me famë botërore Prodigy, i cili ishte gjithashtu një nga pjestarët e dyshes së famshme të hip-hop-it, Mobb Deep, ka ndërruar jetë në moshën 42-vjeçare. Shkaku i vdekjes ende nuk është bërë i ditur por thuhet se reperi ka qenë i shtruar në spital pas problemeve të rënda me aneminë.
Së fundmi, Prodigy ka qenë në Las Vegas për një nga performancat e grupit Mobb Deep. Emri i tij i vërtetë ishte Albert Johnson dhe familja nga e cila vinte kishte një rrugëtim të gjatë në botën e muzikës. Ai gjithmonë është dalluar për tekstet e ashpra dhe rebele të cilat tregonin realitetin e vështirë me të cilin i është dashur të përballet.
Johnson i cili ndante të njëjtën dashuri për hip hop-in bashkë me Havoc, partnerin e tij të grupit, krijuan Mobb Deep, grup shumë i suksesshëm që prej vitit 1993.
Përmes postimeve në llogaritë e tyre të Instagramit, e gjithë bota e repit i ka dhënë lamtumirën e fundit artistit, i cili ka qenë inspirim për shumë nga reperët e gjeneratave të reja.
Burimi: CNN
