38-vjeçarja Monika Abrashi nga Vërdova e Pogradecit, nënë e 2 fëmijëve, është viktima e parë e përmbytjeve si pasojë e reshjeve të ditëve të fundit. Sipas familjarëve të viktimës, 38-vjeçarja ka qenë duke folur në telefon në momentin e ngjarjes, dhe ka shkuar në fund të oborrit për shkak të mungesës së valëve. Përplasja e furishme e ujërave të lumit Vërdovë që kishte dalë nga shtrati me murin rrethues të shtëpisë ka shkaktuar shembjen e tij. Kjo ka bërë që Monika Abrashi të bjerë në lumë ku dhe është mbytur nga ujërat e rrëmbyeshme. Burime nga vendngjarja kanë thënë se djali i saj 12-vjeçar është munduar ta shpëtojë atë por është ndaluar nga fqinjët duke qenë se situata ishte tepër e rrezikshme. Trupi i viktimës është gjetur disa minuta më pas, pranë liqenit të Pogradecit. 2 fëmijët të mbetur tashmë jetimë, janë në pritje të kthimit të babait të tyre i cili është në emigrant.
Burimi: Ora News
