Mbledhjen e të hënës, qeveria shqiptare mori një vendim që lehtëson radhat e gjata në zyrat e Gjendjes Civile dhe pakëson kohën e pritjes për marrjen e dokumentave të nevojshëm nga një institucion shtetëror. Sipas vendimit, çdo zyrë e administratës shtetërore në shërbim të klientit mund të printojë vetë certifikata dhe dokumente të tjera të ngjashme, për sa kohë ka miratimin e qytetarit që kërkon shërbimin.
Kjo do të thotë që nëse aplikoni në një insititucion shtetëror dhe për këtë nevojitet një certifikatë, nuk është më nevoja ta merrni në Gjendjen Civile, pasi punonjësit mund ta printojnë aty, në mënyrë elektronike.
Si rrjedhim, të gjitha institucionet shtetërore do të kenë akses në bazën e të dhënave të Gjendjes Civile dhe të gjitha dokumentet e printuara në këtë mënyrë do të jenë të pajisura me një vulë elektronike të Drejtorisë së Përgjitshme të Gjendjes Civile.
Më së shumti përfitojnë qytetarët që duhet të udhëtojnë në qytetin ku janë të pasaportizuar për të marrë një certifikatë të thjeshtë. Ky vendim, nuk vlen për përfaqësitë e huaja diplomatike në Tiranë, të cilat do të vijojnë të kërkojnë certifikata të notërizuara, shkruan Top Channel.
