Lajmi se Siçilia ose Kreta mund të preken shumë shpejt nga një cunami, e si pasojë e kësaj edhe Shqipëria (lexo ketu), nuk konfirmohet zyrtarisht nga specialistët e Institutit të Gjeoshkencave në Tiranë.
Departamenti i Sizmiologjisë, sqaron se është shumë e vështirë të parashikohet një tërmet, pothuajse e pamundur. E vetmja e vërtetë e lajmit që është dhënë nga disa media në vend por edhe media ndërkombëtare, ka të bëjë me faktin se duhet të kalojnë 100 vjet që të gjenerohet një tërmet i përmasave të mëdha, pra me magnitudë 7.0 të shkallës Rihter. Por, vitet janë relative, pra mund të kalojë 100 vjet por edhe 200, ç’ka do të thotë se nuk ka asnjë të dhënë të saktë që përcakton këtë.
Deri tani sipas Intitutit te Gjeoshkences ka të dhëna shkencore që Shqipëria është prekur këtë verë çdo ditë nga tërmete të vegjël, në zonat sizmoaktive të vendit, të cilët çlirojnë energjinë që akumulohet, por ne nuk i ndjejmë. E thënë më thjeshtë, toka çliron çdo ditë atë që mund të përbënte rrezikshmëri për një tërmet të përmasave të fuqishme.
Zonat më problematike në Shqipëri janë: Zona Lushnjë-Elbasan-Dibër, ashtu si dhe zona joniko-adriatike dhe zona Korçë-Ohër-Peshkopi të cilat njihen si zonat më sizmoaktive në vendin tonë, në të cilat ndodhin mikrotërmete dhe tërmete mesatare.
