Një burrë nga Indonezia, që pretendon të jetë i moshuari më i vjetër në botë, ka festuar ditëlindjen e tij të 146-të. Mbah Gotho vjen nga një fshat i vogël në provincën e Javës qëndrore dhe zotëron dokumenta që provojnë se ka lindur më 31 dhjetor 1870.
Këto të dhëna, pasi janë konfirmuar nga zyra e popullsisë në Indonezi, kanë rezultuar të sakta. Kjo do ta bënte Gotho-n njeriun më të vjetër në botë, titull ky që deri më sot është mbajtur nga Jeanne Calmet, një grua francize që vdiq në moshën 122 vjeçare.
Gotho e festoi ditëlindjen me nipin e tij, Suryanto dhe gruan e tij, Suëarni, ndërsa ka jetuar më shumë se 10 vëllezërit dhe motrat e tij, më shumë se katër gratë dhe fëmijët e tij. Në festime u bashkuan edhe fqinjët, që i kënduan këngën e ditëlindjes, ndërsa vetë 146-vjeçari ia doli të fryjë të gjithë qirinjtë me një tentativë. Jo keq për një njeri që po kap 2 shekuj, apo jo?
Më parë, kur është pyetur rreth sekretit të jetëgjatësisë, Gotho tha: “Receta është vetëm durimi.” Ai thuhet se ka nisur përgatitjet për vdekjen e tij që në 1992-in, madje ka përgatitur edhe varrin, por 24 vite më vonë, vazhdon të jetë gjallë. Në një intervistë të shkurtër të realizuar ë 2016-n për një televizion lokal, i moshuari tha: “Ajo që dua është të vdes”, pasi tani e ka të pamundur të lahet dhe të ushqehet vetë. Nipërit e tij thonë se ai e kalon pjesën më të madhe të ditës duke dëgjuar në radio, sepse shikimin e ka shumë të dobët për të parë televizor.
Burimi: The Independent
