Aleanca mes presidentit amerikan, Donald Trump dhe Elon Musk mori fund të enjten, vetëm disa ditë pasi personi më i pasur në botë u largua nga administrata shtetërore.
Fillimisht, dy ndër burrat me më pushtet dhe ndikim në glob krijuan një aleancë, që ndikoi shumë edhe në riardhjen në pushtet të Donald Trump.
Elon Musk e mbështeti përgjatë fushatës, ndërsa Trump i dha një post të rëndësishëm në administratën e re.
Musk u emërua drejtues i Departamentit të Efikasitetit Qeveritar (DOGE, i krijuar për të ulur shpenzimet. Qëllimi ishte të shkurtoheshin kostot, duke kursyer deri në 1 trilion dollarë, por ky objektiv nuk u arrit plotësisht.
Dorëheqja e Elon Musk
Krejt papritur, Musk dha dorëheqjen nga ky post, duke theksuar se dëshiron të fokusohet në bizneset e tij. Megjithatë, kjo pritej, pasi edhe më herët ishte thënë që ai do të qëndronte përkohësisht në administratë.
Sulmet ndaj Donald Trump
Paqja mbaroi! Musk nisi të kritikojë ashpër një projektligj buxhetor që mbështeste axhendën e Trump. Ai u shpreh i zhgënjyer nga kostoja e paketës dhe premtimet që përmbante.
Ligji në fjalë përfshin ulje të mëdha taksash, rritje të buxhetit të mbrojtjes dhe lejimin e huamarrjes shtetërore në nivele të reja.
Në ditët që pasuan, Musk e quajti projektligjin e Trump “të turpshëm dhe të neveritshëm”.
Trump “kërcënon” Musk
Konflikti kulmoi më 5 qershor, kur Trump kërcënoi të ndalonte kontratat qeveritare me Musk, ndërsa ky i fundit i rikujtoi se nuk do të kishte fituar pa ndihmën e tij.
Trump tha se i kishte kërkuar Musk të largohej nga administrata dhe e akuzoi lidhur me heqjen e subvencioneve për automjetet elektrike. Kujtojmë këtu se vetë Musk zotëron një ndër kompanitë më të njohura për makina elektrike, Tesla.
Musk “plas bombën”
Deklarata që pasoi ishte mjaft e rëndë. Musk tha se emri i Trump ishte në dosjet e çështjes Jeffrey Epstein dhe kjo është arsyeja pse ato nuk janë bërë publike.
Jeffrey Epstein ishte një financier i njohur që u shpall fajtor për abuzime seksuale dhe u vetëvra në burg në vitin 2019, ndërsa po priste gjykimin për trafikim seksual. Në dosje përfshihet edhe rrjeti i personave me të cilët ai ka bashkëpunuar, ndërsa një ndër to, sipas Musk, është edhe presidenti amerikan, Donald Trump.
Në përgjigje, Trump e quajti Musk "të çmendur".
Shihemi në serinë e radhës!
