Shtëpia e Bardhë paralajmëron për grumbullim të “paprecedentë” të trupave serbe në kufirin me Kosovën
Shtëpia e Bardhë tha se ka një grumbullim “të paprecedentë” të trupave dhe armaturave serbe përgjatë kufirit me Kosovën dhe i bëri thirrje Beogradit që t'i tërheqë ato menjëherë.
Forca paqeruajtëse e NATO-s në Kosovë, Kfor, është përforcuar me trupa britanike dhe administrata e Biden tha se po këshillohej me aleatët për të siguruar që qëndrimi i Kfor-it "përputhet me kërcënimin".
“Ky është një zhvillim shumë destabilizues, i cili ka ndodhur gjatë javës së kaluar dhe ne po i bëjmë thirrje Serbisë që të tërheqë forcat nga kufiri dhe të ulë tensionet,” tha të premten zëdhënësi i Këshillit të Sigurisë Kombëtare të SHBA-së, John Kirby.
Tre herë më shumë emigrantë të vdekur ose të zhdukur në Mesdhe këtë verë
"Mesdheu është bërë një varrezë për fëmijët dhe të ardhmen e tyre," paralajmëroi UNICEF të premten. Tre herë më shumë emigrantë kanë vdekur ose janë zhdukur këtë verë teksa përpiqeshin të kalonin Mesdheun.
Këto të dhëna vijnë në mes të negociatave të ashpra diplomatike për çështjet e migracionit në Europë, krahas shumë politikave të diskutueshme për të trajtuar këtë çështje në disa vende.
Midis qershorit dhe gushtit, të paktën 990 njerëz u mbytën në Mesdheun qendror, rruga më e rrezikshme detare në botë që lidh Afrikën e Veriut me Europën.
Aleatë të rinj për Rusinë? Putin takohet me liderin e Sudanit të Jugut për të diskutuar lidhjet më të ngusht
Vladimir Putin i Rusisë dhe presidenti i Sudanit të Jugut, Salva Kiir, duket se i kanë forcuar marrëdhëniet e tyre pas një takimi në Moskë. Dyshja thuhet se kanë rënë dakord të zgjerojnë marrëdhëniet e tyre në fushat e energjisë, tregtisë dhe - më së shumti - naftës.
Të dy udhëheqësit diskutuan gjithashtu çështjet politike dhe të sigurisë në Sudanin e Jugut, i cili po përgatitet për zgjedhjet e para presidenciale në fund të vitit të ardhshëm.
Kryeministri suedez i kërkon ushtrisë të ndihmojë në luftimin e bandave të dhunshme
"Asnjë vend tjetër në Europë nuk po përjeton diçka të tillë," tha Ulf Kristersson, pas rritjes së të shtënave me armë dhe bombave të bandave. Kryeministri i Suedisë tha se ka kërkuar ndihmën e ushtrisë për t'u marrë me një valë të paprecedentë krimi që ka tronditur vendin.
Ai shtoi se do të takohet me komandantin suprem të forcave të armatosura dhe komisarin e policisë kombëtare. Bisedimet do të përqendrohen te mënyra "si forcat e armatosura mund të ndihmojnë policinë në punën e tyre kundër bandave kriminale.”
