Gaza/ 82 punonjës së Mbrojtjes Civile janë vrarë nga sulmet izraelite

Mbrojtja Civile Palestineze në Gaza ka bërë me dije se 82 punonjës së organizatës janë vrarë nga sulmet izraelite, qysh prej fillimit të luftës, më 7 tetor 2023. Më tej, shtoi se 270 të tjerë punonjës janë plagosur dhe më shumë se 75% e qendrave janë shkatërruar.

Nisur nga këto shifra, u tha se vendet nuk janë në gjendje që të mbrojnë personat që punojnë për të ndihmuar çdo ditë palestinezët në Gaza. Organizata akuzoi vendet dhe organizatat ndërkombëtare se qëndrojnë të heshtura përballë shkeljeve të të drejtave ndërkombëtare humanitare nga pushtimi izraelit, duke treguar se 885 persona të personelit mjekësor janë vrarë dhe se kanë ndalur operacionet në 34 spitale e qendra shëndetësore.

Rusi/ Ukraina vijon sulmet

Ukraina vijon sulmet në rajonin Kursk. Pas një sulmi të beftë, që detyroi evakuuimin e mijëra banorëve rusë, Ukraina ka shkatërruar një urë strategjike, duke nënkuptuar se Ukraina mund të ketë në plan të ndalojë furnizimet ruse në këtë rajon, si dhe të përparojë më tej ushtarakisht.

Gjithsesi, ushtria ruse ende ka akses në urat më të vogla në zonë. Ura u nda në dy pjesë pas një sulmi ukrainas, duke ngjallur frikë dhe panik për sulmet e papritura që Ukraina ka bërë. Rikujtojmë se sulmi në Kursk ishte një gjetje shumë strategjike, e cila e surprizoi Moskën dhe bëri që ushtria ruse të tërhiqej në zonat përreth.

Itali/ Një burrë vret babain dhe fqinjën

Një ngjarje tronditëse ka ndodhur në Itali, ku një burrë ka vrarë babain e tij invalid, fqinjën, ka hapur zjarr kundrejt policisë dhe në fund, ka tentuar t’i japë fund jetës. 50-vjeçari Ewald Kuhbacher ka vrarë babain e tij, Herman, i cili ishte 90 vjeç.

Policia italiane bëri me dije se ngjarja ka ndodhur rreth orës 23:00. Fqinjët raportuan se dëgjuan një zënkë dhe më pas ndjenë aromën e gazit. Zjarrfikësit hynë në pallat, ku dëgjuan edhe të shtënat e 50-vjeçarit. Menjëherë erdhi në vendngjarje policia, për t’u përballur me të shtëna nga ana e 50-vjeçarit. Ai qëlloi mbi mjetet e zjarrfikëses dhe mbi fqinjën, e cila doli për të parë se ç’po ndodhte.

Filipine/ Zbulohet rasti i parë me mpox

Në Filipine është zbuluar rasti i parë i virusit mpox, te një burrë 33-vjeçar, i cili nuk kishte udhëtuar jashtë vendit. Rasti i fundit me mpox ishte zbuluar në dhjetor të vitit të kaluar dhe sipas Departamentit të Shëndetësisë (DOH), të gjitha rastet e mëparshme janë izoluar dhe trajtuar.

“DOH do e bëjë procesin e testimit sa më të përshtatshëm që të jetë e mundur, në mënyrë që rastet e dyshuara të identifikohen shpejt dhe të lejohen të qëndrojnë në shtëpi,” tha Teodoro Herbosa, sekretari i departamentit.

Mpox është shpallur një “urgjencë e shëndetit publik me shqetësim ndërkombëtar” nga OBSH.