"Ndryshimi i klimës nuk ka ndaluar", paralajmëron monitoruesi i klimës i BE-së
Pavarësisht përfundimit të një serie rekord temperaturash globale, Europa u godit në korrik nga valë të nxehta ekstreme, përmbytje vdekjeprurëse dhe zjarre të përhapura.
Korriku ishte muaji i tretë më i ngrohtë ndonjëherë në botë, me temperatura mbi normalen në vende si Norvegjia dhe Finlanda, të cilat përjetuan valë të pazakonta të të nxehtit, ndërsa Turqia shënoi një rekord historik prej 50.5 gradë Celcius.
Ekspertët paralajmërojnë se, edhe pse vala e rekordeve globale është ndërprerë “përkohësisht”, efektet e ngrohjes klimatike po rriten dhe kërkohet veprim i menjëhershëm për të shmangur përkeqësimin.
Pakistani zgjat afatin e deportimit për refugjatët afganë, por OKB-ja mbetet e shqetësuar
Pakistani e zgjati afatin për deportimin e miliona refugjatëve afganë deri më 1 shtator, thanë zyrtarët, ndërsa Kombet e Bashkuara e mirëpritën vendimin, por shprehën shqetësim për kthimet e detyruara.
Afganët kanë ikur në Pakistan gjatë katër dekadave të fundit për t'i shpëtuar luftës, paqëndrueshmërisë politike dhe vështirësive ekonomike në atdheun e tyre.
Sulmi ndaj kampit të refugjatëve Zamzam në Sudan mund të ketë vrarë më shumë se 1,500 civilë
Që nga prilli 2023, Sudani ndodhet në një luftë brutale mes ushtrisë shtetërore dhe forcave paraushtarake RSF, me përplasje të përgjakshme veçanërisht në rajonin e Darfurit. Në prill 2025, RSF-ja kreu një sulm 72-orësh ndaj kampit të zhvendosurve Zamzam, duke vrarë mbi 1,500 civilë dhe duke kryer masakra, rrëmbime dhe dhunë seksuale.
Sulmi cilësohet si një nga krimet më të rënda të luftës në konfliktin sudanez, por ka kaluar pa ndonjë reagim të fortë ndërkombëtar.
Trump mund të takohet me Putin-in për bisedime rreth luftës në Ukrainë "që javën tjetër"
Zyrtarë të Shtëpisë së Bardhë kanë thënë se Donald Trump mund të takohet me Vladimir Putinin javën e ardhshme për të diskutuar luftën në Ukrainë, megjithëse ndihmësit e lartë paralajmëruan se mbeten "pengesa" serioze për arritjen e një armëpushimi.
Të mërkurën vonë, presidenti amerikan u tha gazetarëve në Shtëpinë e Bardhë, kur u pyet se kur do të takohej me udhëheqësit e Ukrainës dhe Rusisë: “Ka shumë mundësi që të ketë një takim shumë shpejt.” Trump tha se nuk kishte pasur ndonjë përparim specifik që të çonte në diskutimin e një takimi, por se zyrtarët amerikanë kishin punuar për këtë për “një kohë të gjatë”.
