Bazuar te zhvillimet e fundit në organet e drejtësisë shqiptare vihet re se përfaqësueset gra kanë rezultuar më të besueshme. Pse?
Gjykata Kushtetuese
Gjykata Kushtetuese do të jetë sërish funksionale, pas përzgjedhjes së gjashtë anëtarëve të rinj: Vitore Tusha, Besnik Muçi (i cili nuk e ka kaluar ende vettingun), Arta Vorpsi, Elsa Toska, Fiona Papajorgji dhe Marsida Xhaferllari. Pavarësisht faktit se për momentin ky institucion është ende në kaos – duke qenë se presidenti Ilir Meta ka dekretuar Marsida Xhaferllarin si gjyqtare të Gjykatës Kushtetuese, ndërkohë që Kuvendi njeh si të tillë Arta Vorpsin – duket se për organin më të lartë të drejtësisë në vend janë parë si më të kualifikuara gratë.
Gara për kryeprokuror
Ndonëse në Këshillin e Lartë të Prokurorisë, kandidati që grumbulloi më shumë vota për postin e kryeprokurorit ishte Olsian Çela, duhet të theksojmë që Çela garoi me dy gra, Arta Markun dhe Fatjona Memçajn.
Komisioni i Pavarur i Kualifikimit
I lartë është numri i grave edhe në Komisionin e Pavarur të Kualifikimit, organi kushtetues i ngritur për rivlerësimin kalimtar të gjyqtarëve dhe prokurorëve (vettingu). Nëntë nga dymbëdhjetë komisionerët janë gra, përfshirë këtu edhe kryetaren Genta Tafa.
Mesa duket për momentin, kualifikimi i grave duket më i besueshëm, megjithatë ngelet për t’u parë puna e tyre në vazhdim, sepse sigurisht që bëhet fjalë për një tablo paraprake. Siç e kemi trajtuar në këtë artikull, arritje e jashtëzakonshme quhet vetëm nëse në qeveri ka njerëz, qofshin burra dhe/ose gra, që punojnë për të ndërtuar një sistem të pakorruptuar.
