Pas festave, nuk jeni ju të vetmit që do të bënit të pamundurën për të hequr kilet e shtuara. Prandaj është e rëndësishme të mos stresohemi dhe të bëjmë atë që duhet bërë për t’iu kthyer peshës së mëparshme.
Por si?
Është, sigurisht, më e thjeshtë sesa mendohet. E gjitha qëndron tek ruajtja e ekuilibrit, çka do të thotë se nuk duhet kurrsesi të rrimë pa ngrënë.
Ha mirë
Pasi ke ngrënë pa u frenuar gjatë muajit të fundit, me siguri të shkon mendja t’i heqësh fare ca vakte. Por kjo sipas ekspertëve, vetëm sa do të të shtojë urinë, çka e bën shumë më të vështirë mbajtjen e regjimit.
Kështu që mos e frustro veten, por ulu dhe ha një mëngjes prej vezësh, djathi dhe kosi, sepse të heqin oreksin e pakontrollueshëm gjatë ditës.
Zhduki mbetjet e tavolinës së Vitit të Ri!
Më mirë të mos i hash më. Edhe njeriu me më shumë vullnet do të mposhtej nga tundimi për t’i ngrënë. Kështu që zgjidhja më e mirë është të mos i kesh aty kur hap frigoriferin.
Mos e mbaj mendjen tek të ngrënat e kaluara
Shumë njerëz të ngrënët e tepërt i bën të ndihen në faj. Por e vërteta është se asgjë nuk të shijon më shumë se ushqimi gjatë pushimit me familjen, kështu që harro çfarë ke ngrënë dhe vetëm nisja nga e para.
Vëre prapanicën në lëvizje!
I vetmi ushtrim që ke bërë gjatë pushimeve ishte ulja dhe ngritja e pirunit. Por kohërat e rehatisë ikën dhe tani duhet të rikuperosh: nise me ushtrime të lehta dhe dita-ditës shpeshtoji. Tregohu më i shkathët, përpara se dhjami të shtrohet mirë e mirë në barkun tënd.
Mbaji larg ushqimet e bardha!
Hiqe bukën e bardhë, ushqimet e paketuara apo sanduiçet. Ke ngrënë ca si shumë ëmbëlsira dhe ushqime me ekstra kripë gjatë muajit të fundit dhe me siguri, trupi ka grumbulluar plot ujë rezervë, sepse kështu bën kur befas merr sasi shumë të lartë sheqeri dhe kripe. Kështu, për të humbur peshën e ujit, duhet të evitosh ushqimet e bardha, me shumë kripë, dhe do ta ndjesh diferencën brenda 48 orëve.
Perime dhe s’të shkon mendja të hash tërë ditën
Perimet janë reduktuese natyrale të urisë. E kundërta ndodh me bukën, që e shton urinë, prandaj edhe restorantet e kanë me kaq shumë qejf të ta mbushin tryezën me bukë. Por ti s’duhet të biesh pre e tyre.
Shishen me vete!
Shishja e ujit është nona. Sipas ekspertes Valerie Orsoni, shumicën e herëve kur mendojmë se na hahet jemi në fakt, të etur për ujë. Përveçse të mbush barkun dhe të pret oreksin për ca kohë, uji është shkarkues i toksinave që pas pushimeve, i kemi me shumicë. Pi ujë dhe do falenderosh veten për gjithë vitin.
Burimi: "Glamour"
