Ministrja e Arsimit, Besa Shahini deklaroi se ka dy opsione për rifillimin e shkollave. Njëra prej tyre është që mësimi të fillojë në zonat e paprekura dhe të shtyhet në zonat e shpalljes së gjendjes së jashtëzakonshme.
Opsioni tjetër të cilin ministrja e quajti si më pak të preferuar, është që në Durrës, Tiranë dhe Lezhë mësimi të mos fillojë vetëm në zonat dhe shkollat e prekura që paraqesin probleme.
“Kemi dy opsione për nisjen e procesit të shkollës. Të rifillojë mësimi në të gjitha qarqet e paafektuara. Të rifillojë në zonat e paprekura dhe të shtyhet mësimi në zonat e shpalljes së gjendjes së jashtëzakonshme. Një opsion i dytë më pak i preferuar nga ana jonë është që të mos fillojë mësimi në Durrës dhe në qarqet Tiranë dhe Lezhë të mos fillojë mësimi vetëm në shkollat e verifikuara me probleme. Unë mendoj që kjo do paraqiste më pas një çakordim të punës në këto qarqe. Për këtë duhet të marrim një vendim si vendim”.
Pas bilancit të bërë për shkollat e dëmtuara, Shahini tha se përveç Durrësit kanë pësuar dëme shkollat në Tiranë, Elbasan dhe Lezhë.
Në qarkun e Durrësit, Shahini tha se janë rreth 16 objekte shkollore dhe kopështe të cilat ose janë të dëmtuara rëndë dhe s'mund të hapen ose kanë nevojë thjesht për riparime. Në Tiranë, janë rreth 23 shkolla të dëmtuara në nivele të ndryshme dhe rihapja e tyre e menjëhershme nuk është e mundur.
Në Lezhë 10 shkolla, 3 të dëmtuara më rëndë dhe 7 të dëmtuara më lehtë, por që nuk mund të rihapen menjëherë. Në Elbasan janë 3 shkolla që s'mund t'i kthehen normalitetit të menjëhershëm.
"Dëmtimet në Tiranë, Lezhë dhe Elbasan nuk janë të niveleve në Durrës. Sidoqoftë ka nevojë për pak kohë për t’u riparuar. Ka shkolla të tjera me dëmtime të lehta dhe nuk paraqesin asnjë rrezik për nxënësit. Në 26 nëntor drejtorët e shkollave apo dhe të drejtorive arsimore kanë identifikuar numrin e shkollave që kanë paraqitur ndonjë shqetësim. Më 27 nëntor Instituti i Ndërtimit kanë bërë inspektimet në zonën e Durrësit. Më datë 28-29 janë bashkëngjitur inxhinierë nga Kosova dhe kanë inspektuar shkolla, në Tiranë, Durrës Lezhë. Më 30 Nëntor kemi bërë analizën e detajuar mbi situatën në fjalë.
Janë inspektuar të gjithë shkollat publike, dhe ato private sot. Kemi bërë një plan zhvendosje që nxënësit të vijojnë mësimin në shkollat që nuk mund të hapen menjëherë. Kemi bërë plan me transportin. Kemi organizuar me kujdes të gjithë kujdesin psiko-social. Me Fakultetin e Shkencave Sociale po bëhen edhe grupe ë të mëdha të studentëve Master që do na vijnë në ndihmë. Nuk mendoj që në Durrës përkundër masave që kemi marrë është koha që të fillojmë qysh të hënën. Mendoj që qarqet kanë nevojë për pak kohë që të bëhen riparimet që të hapen shkollat dhe të rifillojë mësimi."- vijoi ajo.
