Një djali indian 7-vjeçar, që ndonjëherë ankohej se kishte dhimbje, iu gjetën 526 dhëmbë në brendësi të nofullës.
Kolegji dhe spitali dental Saveetha, në Chennai, realizoi ndërhyrjen kirurgjikale dhe nxorri me sukses dhëmbët që ndodheshin brenda një qeske të vendosur në zonën molare të nofullës së poshtme.
“Dhëmbët ishin të madhësive të ndryshme. Më i vogli ishte 0.1mm e më i madhi 3mm. Kishin kurora, enamel dhe rrënjë të vogla,” tha Pratibha Ramani, kreu i departamentit të patologjisë orale dhe maksofaciale në spital.
“Hapëm një vrimë nga brenda gojës në nofullën e poshtme dhe hoqëm qeskën,” tha Ramani. “Teksa qeska zhytej më thellë në ind, dhëmbët zvogëloheshin më tej.”
Edhe pse kishte mbi 500 dhëmbë në gojë, djali nuk kishte shumë dhimbje, tregon mjekja. “E vetmja gjë që e shqetësonte ishte një dhëmballë që s’po shpërthente. I shkaktonte dhimbje ndonjëherë dhe enjtej çdo ditë nga pak.”
7-vjeçari vuante nga një tumor beninj, i cili nuk dihet nëse u shkaktua nga faktorë gjenetikë apo mjedisorë.
Ky lloj tumori është shumë i rrallë. Në një rast të ngjashëm, në vitin 2014, mjekët në Mumbai, hoqën 232 dhëmbë nga goja e një djali 17-vjeçar pas një operacioni që zgjati shtatë orë.
Ndërsa operacioni në Chennai zgjati rreth dy orë, por u deshën dhjetë ditë për të analizuar gjithë dhëmbët. Mjekët shpresojnë t’i studiojnë më tej përmes analizave gjenetike.
Djali, që tani ka 21 dhëmbë, u lejua të shkonte në shtëpi pas tre ditësh dhe është shumë mirë.
Burimi: The Guardian
