Zjarret përfshijnë Spanjën dhe Portugalinë, evakuime dhe mijëra forca emergjence në terren
Zjarret masive që kanë përfshirë Spanjën dhe Portugalinë kanë detyruar autoritetet të evakuojnë banorë dhe të angazhojnë mijëra pjesëtarë të shërbimeve të emergjencës, teksa vala e të nxehtit vazhdon të godasë Gadishullin Iberik.
Kryeministri spanjoll Pedro Sánchez vizitoi zonat e prekura nga zjarret në Ourense dhe León, ku u takua me drejtuesit e ekipeve të emergjencës dhe koordinimit. Ai shoqërohej nga ministri i Brendshëm, Fernando Grande-Marlaska.
Në një konferencë për shtyp, Sánchez deklaroi se “orët dhe ditët e ardhshme janë kritike” dhe se qeveria do të sigurojë ndihmën e nevojshme për shuarjen e flakëve, përfshirë edhe angazhimin e 500 ushtarëve shtesë.
Ai theksoi se ndërhyrja aktuale e forcave të emergjencës është "ndoshta" mobilizimi më i madh i mbrojtjes civile në historinë evropiane. Gjithashtu, Sánchez njoftoi se qeveria spanjolle do të propozojë një pakt kombëtar për të përshtatur vendin ndaj ndryshimeve klimatike.
Europianët kërkojnë unitet me Ukrainën para takimit historik në Uashington
Përpara një takimi të rëndësishëm të “Koalicionit të Vullnetit” që do të mbahet të hënën në Uashington, liderët europianë përsëritën nevojën për një front të bashkuar me Ukrainën për të arritur një paqe të qëndrueshme.
Liderët europianë morën pjesë në një bisedë virtuale të dielën me presidentin ukrainas, Volodymyr Zelensky dhe presidenten e Komisionit Europian, Ursula von der Leyen, përpara bisedimeve me presidentin amerikan Donald Trump.
Diskutimet u përqendruan në çështje kyçe si ndalimi i luftimeve në Ukrainë, ruajtja e presionit të plotë ndaj Rusisë përmes sanksioneve, parimi që është Ukraina ajo që vendos për territorin e saj, si dhe nevoja për garanci të forta sigurie për të mbrojtur interesat e sigurisë së Ukrainës dhe Europës.
Video virale tregon ndihma humanitare me myk në Gaza
Një video që po përhapet me shpejtësi në rrjet tregon një të ri palestinez duke hapur një qese ndihmash që pretendohet se është hedhur nga ajri në Rripin e Gazës.
Brenda qeses ndodhen pako me ushqime të mbuluara nga myku.
I riu në video thotë se qeset janë hedhur me parashutë në zonat Khan Younis dhe Deir Al-Balah, dhe se po shiten “në treg” për rreth 100 dollarë (afërsisht 85 euro).
“Shikojeni! Ka myk,” thotë ai, duke treguar paketimet e mbuluara me një substancë të errët. “Ja si po na vjen ndihma, me myk.”
Në paketim duket logoja e kompanisë JOMIPSA, me qendër në Alicante të Spanjës, e cila furnizon me ushqime dhe ndihma humanitare qeveritë europiane dhe NATO-n.
Arrestime dhe protesta në Izrael për lirimin e pengjeve nga Gaza
Policia izraelite arrestoi 38 persona të dielën gjatë protestave në mbarë vendin, ku demonstruesit kërkonin nga qeveria të arrijë një marrëveshje për lirimin e pengjeve të mbajtura nga Hamasi në Gaza.
Protestuesit u mblodhën në dhjetëra pika në gjithë Izraelin, përfshirë para shtëpive të politikanëve, shtabit të ushtrisë dhe në autostrada kryesore. Policia përdori ujë me presion për t’i shpërndarë, ndërsa disa restorante dhe teatro u mbyllën dyert në shenjë solidariteti.
Protestat erdhën pasi Izraeli njoftoi për një ofensivë të zgjeruar në Gaza, një veprim që protestuesit e shohin si kërcënim për jetën e pengjeve të mbetura.
