Rregullatori i ilaçeve në Europë ka reaguar pas zërave në rritje për efektet anësore të vaksinës së Oxford/AstraZeneca duke thënë se përfitimet i tejkalojnë rreziqet, fill pasi katër vende të mëdha të BE njoftuan se po pezullonin përdorimin e saj.

Gjermania, Franca, Italia dhe Spanja ndaluan përkohësisht vaksinën pasi raportuan incidente gjakderdhjeje, mpiksje gjaku dhe një numër të ulët të trombociteve të gjakut në disa njerëz që kishin marrë vaksinën AstraZeneca.

Agjencia Europiane e Barnave tha në një deklaratë se "shumë mijëra njerëz zhvillojnë mpiksje gjaku në vit në BE për arsye të ndryshme" dhe se numri i incidenteve tek njerëzit e vaksinuar "duket se nuk është më i lartë se ai që shihet në popullatën e përgjithshme".

EMA tha se po punon me AstraZeneca-n dhe rregullatorët kombëtar të shëndetit, duke përfshirë Agjencinë Rregullative të Barnave dhe Produkteve Shëndetësore (MHRA) në Mbretërinë e Bashkuar, ku 11 milionë njerëz kanë bërë vaksinën, për të analizuar të gjitha të dhënat në dispozicion dhe për të përcaktuar nëse vaksina mund të ketë ndikuar.

MHRA, që mbledh raporte të efekteve anësore mbi ilaçet dhe vaksinat në Mbretërinë e Bashkuar përmes skemës së saj të "kartonit të verdhë", tha për Guardian se kishte marrë më shumë njoftime deri më 28 shkurt për mpiksjen e gjakut nga vaksinat Pfizer/BioNTech sesa Oxford/AstraZeneca - 38 kundrejt 30 - megjithëse asnjëra nuk tejkalon nivelin e pritur në popullatë.

Komiteti i EMA-s do të mblidhet të martën (16 mars) për një vendim të mëtejshëm.

Burimi: Guardian, EMA