Foto: shamrockemerald/ Pinterest

Nëse e sheh veten pa lekë pothuajse çdo fund muaji dhe s’e kupton ku ikin, ka shumë të ngjarë që nuk është vetëm faji i pagës tënde. Shpesh janë zakonet e përditshme që i kemi bërë të zakonshme, edhe pse në të vërtetë janë financarisht të dëmshme.

Ja cilat janë disa nga zakonet që shumica prej nesh i bëjnë, pa e kuptuar që janë sabotim i pastër ndaj vetes

1. Kursen vetëm nëse mbetet gjë në fund të muajit

Në vend që të vendosim një shumë fikse mënjanë sapo marrim rrogën, shumë prej nesh presim të na mbetet diçka në fund. Spoiler: zakonisht nuk na mbetet asgjë. Zgjidhja? Vendos menjëherë një shumë (edhe 1.000 lekë të reja në muaj janë më mirë se zero) në një llogari kursimi dhe menaxho pjesën tjetër për shpenzime.

2. Nënvlerësimi i shpenzimeve të mirëmbajtjes

Blerja e një shtëpie apo makine është thjesht hapi i parë. Ato duan mirëmbajtje dhe kjo shkon shumë më tepër seç mendojmë. Nëse nuk planifikon që në fillim për këto shpenzime, pas një viti mund të përfundosh me borxhe ose probleme të pazgjidhura.

3. Mosplanifikimi për situata emergjente

Një fond emergjence është domosdoshmëri. Edhe nëse nuk mund të grumbullosh 3 muaj shpenzime menjëherë, edhe 10.000 apo 20.000 lekë janë një ndihmë e madhe në raste të papritura. Në vend që të hysh menjëherë në minus, ke një hapësirë sigurie.

4. Thjesht se ke mundësinë për të blerë diçka, s'do të thotë që e përballon

Jo çdo para që ke në dorë është për t’u shpenzuar. Nëse një blerje do të thotë që do të futesh në kredi ose do të zbrazësh llogarinë, nuk është diçka që realisht e përballon. Mund ta kesh shumën, por jo luksin për ta harxhuar.

5. Rritja e stilit të jetesës sa herë që të rritet rroga

Kur fillon të fitosh më shumë, instinktivisht rrit edhe standardin: ushqime më të shtrenjta, rroba më të mira, pushime më luksoze. Ky është gabimi klasik që quhet "inflacion i stilit të jetesës". Në vend që të kursejmë më shumë, thjesht harxhojmë më shumë.

6. Ushqimi i hedhur përkthehet në para të hedhura

Të gjithë kemi bërë ndonjëherë blerje të uritur"në supermarket, për të përfunduar duke hedhur zarzavate të kalbura në kosh. Por herën tjetër, mendoje: po hedh para në plehra. 

7. Kredi afatgjata sepse "pagesa është më e vogël"

Një pagesë mujore më e ulët mund të duket e përballueshme, por në realitet do të paguash shumë më tepër me kalimin e viteve, sidomos nëse merr kredi për një makinë që humbet vlerë çdo ditë. Në vend që të zgjasësh pagesën për ta bërë më të lehtë, ndoshta është më mirë të zgjedhësh diçka më të lirë.

_{Burimi: Your Tango}