Foto: ntrlskinco/ Instagram

Kur mendon për antioksidantë, me siguri të shkon mendja te fruta si boronicat apo perime me ngjyra të ndezura si specat. Por, sipas dietologëve, disa nga ushqimet më të zakonshme, madje edhe ato me ngjyra më "të mërzitshme" si kafe apo bezhë, janë në fakt të pasura me përbërës që luftojnë inflamacionin dhe ndihmojnë në parandalimin e sëmundjeve kronike.

Ja 7 prej tyre që ndoshta nuk i ke pasur në radar, por ia vlen t’i fusësh në shportën e radhës:

1. Gjalpi i kikirikut

Po, është burim proteinash bimore dhe yndyrnash të shëndetshme, por gjithashtu përmban sasi të mira të vitaminës E dhe komponimesh fenolike, të dyja me rol të fortë antioksidant. Nëse do ta bësh akoma më të shëndetshëm, zgjidh gjalpë kikiriku pa kripë apo vajra të shtuar dhe nëse ka edhe lëkurën e kikirikut të përfshirë, aq më mirë, pasi lëkura ka më shumë antioksidantë se boronicat dhe çaji jeshil.

2. Hurmat arabe

Të njohura si “karamelet e natyrës”, hurmat arabe nuk janë thjesht të ëmbla, janë një "bombë" antioksidantësh. Përmbajnë karotenoide, flavonoide dhe fitosterole, që ndihmojnë në uljen e rrezikut për sëmundje të zemrës, kancer, Alzheimer dhe kanë veti antimikrobike.

3. Ullinjtë

Edhe pse të gjithë flasin për vajin e ullirit, harrojmë se edhe vetë ullinjtë janë të pasur me vitaminë E dhe hidroksitirosol, përbërës me efekt antiinflamator dhe antioksidant. Kujdes vetëm me kripën, sepse zakonisht ata përpunohen me shumë natrium, ndaj laji pak para se t’i hash, sidomos nëse ke tension të lartë.

4. Patatet

Mund të mos duken "super ushqim", por patatet janë të mbushura me vitamina si C, E, B1, B6, B9 dhe përmbajnë polifenole antioksiduese si flavonoide dhe acide klorogjenike. Madje, janë edhe burim i niseshtes rezistente, që ndihmon në shëndetin e zorrëve duke ushqyer bakteret e mira.

5. Tërshëra 

E njohur për aftësinë për të ulur kolesterolin, tërshëra është gjithashtu e pasur me avenantramidë, një antioksidant specifik për tërshërën që lufton inflamacionin. Për më tepër, beta-glukani në tërshërë ndihmon në prodhimin e acideve yndyrore me zinxhir të shkurtër në zorrë, që kanë efekte antiinflamatore. Shto fruta të freskëta dhe arra mbi tërshërën e mëngjesit për një "super miks" antioksidantësh.

6. Kafeja

Ajo kafeja e mëngjesit s’të jep vetëm energji, është gjithashtu një burim i papritur antioksidantësh. Kërkimet kanë zbuluar se kokrrat e kafesë përmbajnë mbi 100 përbërës antioksidantë, përfshirë acidet fenolike dhe flavonoidet.

7. Kërpudhat

Edhe kërpudhat janë ndër ato ushqime që pak kush i mendon si burim antioksidantësh. Antioksidantët që gjenden te kërpudhat mund të ndihmojnë edhe në mbrojtjen e trurit nga inflamacioni. 

_{Burimi: Eating Well}