Jennifer Lopez

Emri Chris Appleton është sinonim i flokëve mahnitës të personazheve të famshëm. Klientela e tij përfshin disa nga gratë më të njohura në botë, përfshirë Jennifer Lopez, Kim Kardashian, Dua Lipa dhe Drew Barrymore, ndër të tjera.

Edhe pse ai mund të bëjë mrekulli me modelet e flokëve që krijon për paraqitjet e tyre në tapetin e kuq, qasja e tij si stilist flokësh gjithmonë fillon me kujdesin e tyre. 

“Flokët e bukura fillojnë nga brenda”, thotë ai, dhe meqenëse çdo gjë që prek përfundon e bukur, kur ai jep këshilla, ne i mbajmë shënim.

Sa shpesh duhet t’i lani flokët

“Një pyetje që më bëhet shpesh! Sinqerisht, varet nga individi, nga tekstura dhe lloji i flokëve të tyre, pasi lloje të ndryshme flokësh kërkojnë kujdes të ndryshëm. Për shembull, nëse keni flokë shumë të hollë që janë të dobët ose me yndyrë, atëherë është më mirë t’i lani më shpesh, mbase çdo dy ditë, pasi e dimë që larja e tyre çdo ditë nuk është gjithmonë e përshtatshme ose e mundur. Nëse keni flokë më të trashë ose më të thatë, mund t’i lani më rrallë.”

Si të zgjidhni produktet e duhura

"Është e rëndësishme të kuptoni llojin dhe gjendjen e flokëve tuaj, pasi kjo do të përcaktojë se cilat produkte duhet të përfshini në rutinën tuaj individuale të kujdesit dhe sa shpesh do t'ju duhet t'i përdorni ato."

Çfarë duhet të shmangni për flokë të shëndetshëm

"Shmangni përdorimin e tepërt të nxehtësisë dhe lyerjen e shpeshtë, pasi kjo gjithmonë do të shkaktojë dëmtime dhe këputje të flokëve."