Në fshatin Priskë e Vogël, 40 kilometra larg Tiranës jetojnë afërsisht 20 fëmijë, të cilët për të marrë dije duhet të shkojnë çdo ditë në Zallherr. Rruga nga fshati deri në Zallherr kushton 120 lekë dhe prindërit jo gjithmonë munden t’i sigurojnë paratë.
Në një kronikë sociale nga Top Channel- it, vogëlushi Enea, banor i Priskës së Vogël tregon se të enjten nuk ishte në shkollë pasi prindërit s’kishin para t’i jepnin.
“Pardje nuk isha në shkollë, ndërsa dje po. Kur ika në shkollë mësuesja më tha pse nuk kisha shkuar një ditë më parë. I thashë të vërtetën, s’kisha para që t’i jepja furgonit. Nuk e di nëse do të shkoj çdo ditë, sepse ne nuk ia kemi dhënë furgonit paratë.”
Për të siguruar të ardhurat, babai i Eneas bën punë krahu. Ai ka 3 fëmijë, dy prej të cilëve i dërgon në shkollë dhe ku vetëm për rrugën i duhen 240 lekë, ndërkohë që shteti jep vetëm 80 lekë për fëmijë.
“Unë kam tre fëmijë. Dy i kam në shkollë një në kopsht. Nuk kam as ndihmë ekonomike, as në punë shteti nuk jam. Punë krahu punoj çfarë të më dali që të çoj fëmijët në shkollë. Dje i ndalova fëmijët për shkollë. Sot morën masa gjasmë do t’i sjellim lekët nuk i sollën. Nëser unë i ndaloj prapë sepse shoferi nuk i merr pa lekë. Aq sa na ka ofruar shteti shoferi nuk është dakord.”
