Pas ndarjes nga ish-bashkëshorti, këngëtari Joe Jonas në vitin 2023, aktorja britanike Sophie Turner, e njohur për rolin e saj në “Game of Thrones”, la pas jetën në Shtetet e Bashkuara për t’u rikthyer në atdheun e saj, Angli. Që prej asaj kohe, ajo nuk është kthyer më në SHBA dhe duket se nuk ka asnjë plan për ta bërë këtë së shpejti.
Në një intervistë të publikuar më 22 gusht për revistën Flaunt, 29-vjeçarja, e cila ka dy vajza, Willan, 5 vjeç, dhe Delphinen 3 vjeç, me anëtarin e “Jonas Brothers”, tha se rikthimi në Angli i ka dhënë një perspektivë të re mbi jetën dhe prioritetet e saj.
“Thjesht ndihem si në shtëpi këtu,” tha Sophie. “Nuk dua të shpërngulem më kurrë. Kur jetoja në Amerikë, nuk e kuptoja sa shumë më duheshin miqtë dhe familja dhe sa të rëndësishëm janë ata për mirëqenien tënde, derisa u gjenda larg tyre. Tani që jam kthyer, e vlerësoj çdo moment me ta.”
Ndarja me Joe Jonas dhe beteja për kujdestarinë
Ndarja dhe procesi i divorcit me Joe Jonas ishte një periudhë e vështirë për të dy, duke sjellë jo pak tension, veçanërisht rreth kujdestarisë së fëmijëve. Çifti arriti një marrëveshje në tetor të vitit 2023, por Sophie nuk e fshehu zhgënjimin e saj me mënyrën si u zhvilluan ngjarjet.
“Jam e zhgënjyer nga mënyra si shkuan gjërat, sidomos për shkak të fëmijëve,” tha ajo. “Ata janë viktimat në gjithë këtë histori. Por po përpiqemi të bëjmë më të mirën. Jam e sigurt që do ta kalojmë këtë. Joe është një baba i mrekullueshëm për vajzat tona dhe kjo është gjithçka që kërkoj.”
Nga ana tjetër, Joe Jonas foli për marrëdhënien e tyre pas ndarjes në një deklaratë gjatë turneut On Purpose Live të Jay Shetty-t në maj:
“Kemi një raport të bukur për të cilin jam shumë mirënjohës. Të kesh një nënë të jashtëzakonshme si Sophie për vajzat tona është një ëndërr e bërë realitet.”
