Zayn Malik duket se është në të njëjtën mendje me shumë fansa në internet. Gjatë një koncerti të tij në Las Vegas, ish-anëtari i One Direction falenderoi publikun që zgjodhi ta kalonte mbrëmjen me të. Në të njëjtën kohë, ai duket se bëri një koment të tërthortë mbi debatet e fundit rreth çmimeve të larta të biletave për koncertet e ardhshme të Harry Styles.
“Dua t’ju falënderoj sinqerisht secilin prej jush që jeni këtu sonte. Mund të ishit kudo tjetër, por zgjodhët të kalonit mbrëmjen me mua,” tha Zayn.
Më pas shtoi me shaka:
“Shpresoj që biletat të mos kenë qenë shumë të shtrenjta.”
Zayn Malik makes comment on ticket prices while thanking fans:
— Pop Crave (@PopCrave) January 29, 2026
“A big, big thank you to each and every one of you for being here with me tonight. You could’ve been anywhere, but you decided to spend your night with me. Hopefully the ticket prices weren’t too high, just saying.” pic.twitter.com/Ym5iylzJhx
Komenti i Zayn Malik u interpretua menjëherë nga fansat si një thumbim ndaj Harry Styles, pasi erdhi vetëm pak ditë pas nisjes së shitjes së biletave për koncertet e tij dhe në një moment kur rrjetet sociale u mbushën me ankesa për çmimet shumë të larta.
Zayn dhe Harry, të dy ish-anëtarë të One Direction, prej vitesh nuk kanë ruajtur një marrëdhënie të afërt pas largimit të Zayn nga grupi në vitin 2015, ndaj dhe komenti u pa si i qëllimshëm, edhe pse emri i Harry-t nuk u përmend drejtpërdrejt.
Dyshja nuk kanë pasur konflikte publike, por distancimi i hershëm mes tyre ka ushqyer prej kohësh spekulime për një raport të ftohtë, gjë që e bën reagimin e Zayn të tingëllojë më shumë si ironi sesa si rastësi.
Komentet e tij vijnë pasi biletat për koncertet e Harry Styles dolën në shitje më 26 janar. Fansat reaguan menjëherë në rrjetet sociale, duke u ankuar për çmimet, të cilat sipas raportimeve shkonin nga 50 deri në mbi 1,180 dollarë, përfshirë tarifat shtesë të shitjes së biletave. Kompania që i shet biletat deklaroi se çmimet nuk ishin rritur në bazë të kërkesës.
Në rrjetet sociale, shumë fansa shprehën pakënaqësinë e tyre. “Së bashku, së bashku (që është dhe titulli i turneut të tij), por vetëm nëse ke shumë para,” shkroi një prej tyre. Një tjetër tha se çmime të tilla e bëjnë muzikën të paarritshme për shumë njerëz që nuk kanë mundësi të shpenzojnë qindra e mijëra dollarë për një biletë të vetme.
Harry Styles nuk ka reaguar ende publikisht ndaj kritikave dhe as nuk ka njoftuar për ndonjë ndryshim të çmimeve për koncertet e tij të ardhshme.
