Si çdo marrëdhënie tjetër, edhe ajo me familjarët përballet me konflikte, keqkuptime dhe plagë që jo gjithmonë shërohen lehtë. Lidhja e gjakut shpesh na shtyn të tregojmë më shumë durim, të falim më shumë seç do të bënim në çdo raport tjetër vetëm për të mbrojtur marrëdhëniet me njerëz që ne i konsiderojmë të shtrenjtë.
Por sado ta dëshirojmë, kjo jo gjithmonë është e mundur. Ka disa konflikte të cilat nuk është e lehtë të lihen pas krahëve e me sa duket kjo gjë u ka ndodhur edhe disa VIP-ave në Shqipëri, të cilët për arsye nga më të ndryshmet kanë vendosur herë përkohësisht e herë të tjera përgjithmonë, të shkëpusin lidhjet me familjarët.
Dafina Zeqiri
Dafina Zeqiri dhe motra e saj, Besa, nuk kanë pasur marrëdhënie me babain e tyre që nga fëmijëria.
Motra e saj deklaroi vite më parë se i ati i braktisi në moshë shumë të vogël.
Ajo tha se ai nuk ishte interesuar për to për 21 vjet me radhë, derisa më pas i ka kontaktoi papritur, por gjatë deklaratës la të nënkuptohej se nuk kishin ndërmend ta falnin.
Xhensila Myrtezaj
Këngëtarja foli për divorcin mes prindërve gjatë një interviste në emisionin “Mirëmbrëma Yje” me Arbana Osmanin.
Ajo tregoi se kur ishte 6 vjeç ka parë babain duke goditur me thikë nënën e saj, kjo e fundit si pasojë e sulmit me thikë humbi krahun.
E gjitha skena ishte parë nga Xhensila, e cila e përshkroi si ngjarjen më traumatike të jetës së saj, por ndonëse kjo ishte një ngjarje mjaft e rëndë, këngëtarja theksoi se ai mbetet babai i saj, ndërsa shtoi se vetëm e ëma ka zgjedhur ta falë.
Ermal Meta
Këngëtari i njohur Ermal Meta ka folur në intervista të ndryshme për një marrëdhënie të vështirë me familjen gjatë viteve të hershme të jetës së tij.
Ai ka treguar se është rritur në kushte të vështira dhe se ka pasur periudha të gjata distancimi emocional nga familjarët, sidomos me babain me të cilin e shmangte komunikimin edhe gjatë kohës kur jetonin bashkë.
Në një intervistë për Corriere Della Sera ai u shpreh se kishte një familje të tmerrshme.
“Unë kisha një familje tradicionale që ishte e tmerrshme. Babai im nuk ishte njeri i mirë, do të kisha preferuar një mijë herë diçka ndryshe.”
Mali – Big Brother VIP Albania 5
Një ndër momentet më të sikletshme, por edhe të dhimbshme në të njëjtën kohë ishte ai mes Malit dhe babait të tij, të cilët nuk ishin takuar prej shtatë vitesh.
I ati erdhi ta vizitonte në shtëpi, por Mali refuzoi ta takonte duke treguar se prej vitesh ai dhe pjesa tjetër e familjes i kishin shkëputur komunikimet me të.
Edhe pse nuk arritëm të kuptonim cili ishte problemi konkret mes tyre, Mali u shpreh se mundësia e dytë iu jepej njerëzve që mësonin prej gabimeve, gjë kjo e cila sipas tij nuk kishte ndodhur në raport me babain.
Stelina – Big Brother VIP Albania 5
Edhe Stelina, një tjetër banore e BBVA 5, ka folur për marrëdhënien e vështirë me të atin, të cilin e cilësoi si përbindëshin e jetës së saj.
Gjatë rrëfimit në "Big Brother" ajo kujtoi një moment të dhimbshëm nga e kaluara, ku babai i saj kishte ushtruar dhunë mbi të ëmën.
Herët e fundit kur ajo ishte takuar me të atin ishin pas ngjarjes, ku ai ishte në burg.
Më pas vendosi të mos e shihte më derisa në qershorin e vitit të shkuar mësoi se kishte ndërruar jetë.
Robert Berisha dhe Tuna
Robert Berisha ka qenë shumë i qartë në deklaratat e tij publike: ai nuk mbante asnjë raport me Tunën, asokohe gruaja e vëllait të tij, Patris Berisha.
Mbi këtë vendim ai foli gjatë një interviste në emisionin “Rudina” ku shpjegoi se nuk do të ishte më pjesë e asnjë gëzimi familjar për shkak të Tunës.
"Ne nuk ishim në festën e nipit dhe i kërkoj falje Patrisit, por nuk do të jemi në asnjë gëzim familjar për shkak të Tunës. Nuk e di, për atë [Patrisin] dhe Tianin do jepja jetën, megjithatë shpresoj që Tuna të bëhet një nënë e mirë”, u shpreh ai në atë kohë.
Niko Komani
I ftuar në rubrikën “Në makinë, me këngët e preferuara” me moderatore Orinda Hutën, Niko Komani u shpreh 10 vite më parë se prej tre vitesh nuk fliste me të atin.
Sa i takon arsyes së konfliktit stilisti u shpreh se ngjashmëria e karakterit mes tyre kishte bërë që ata të kishin herë pas here përplasje.
Por, kjo nuk do të thotë se ai nuk e do atë:
"Ai është gjaku im dhe këtu mbaron gjithçka,” u shpreh ai.
Ndërkohë mbi këtë temë ne pyetëm edhe ndjekësit tanë. Në një ask që hapëm në faqen e Instagramit të Anabel mbi arsyen kryesore pse kishin vendosur të mos flisnin më me disa prej familjarëve, disa prej ndjekësve ndanë historitë e tyre:
"Me të dy në kohë të ndryshme. Me babin për shkak të mungesës së respektit ndaj kohës sime, ndërsa me mamin për kontrollin që ende donte të kishte mbi mua edhe pse unë e kundërshtoja."
"Një ditë thashë boll, mund t'ia dal vetë dhe ashtu bëra."
"Babai im nuk ka punuar kurrë në jetën e tij dhe nuk i është përgjigjur kurrë përgjegjësive të tij si prind. Përkundrazi, me rrogën e mamasë shkonte në kazino dhe futej në borxhe. Sot unë jam 25 vjeç ndërsa ai 55 dhe është divorcuar me mamanë time.
Ndonëse kam fituar stabilitet financiar nuk e ndiej ta ndihmoj dhe automatikisht shmang komunikimin me të. Mbase bëj mirë, mbase bëj gabim, këtë nuk e di, por di që bëj atë çfarë ndiej."
"Dhuna psikologjike, fizike, emocionale, alkooli e të tjera."
"Ndërhyrje në jetën personale të tipit: 'Do ta di unë me kë del! Martohu!' Dhunë psikologjike dhe fizike."
"I kam bërë bllok mamit rrallëherë, sepse është shumë e pandjeshme dhe nuk më ka kuptuar kurrë."
"Më braktisi 3 vjeç."
"Nuk ishte kurrsesi dakord me patnerin që unë zgjodha. Kam ikur nga shtëpia."
"Kontroll, manipulim, ktheu vëllezërit dhe motrat kundër meje."
"Kam përshtypjen se im atë më urren. Të paktën këtë dëshmon sjellja e tij."
"Jo me prindërit e mi, por me të tijët. Arsyeja ishte sepse nuk më pranonin pasi unë jam 4 vite më e madhe."
