Matthew Koma, bashkëshorti i aktores Hilary Duff, është bërë pjesë e debatit publik mbi grupin toksik të nënave, ku përfshihet edhe gruaja e tij.
Ai publikoi më 6 janar përmes një story, një foto ku kishte montuar fytyrën e tij mbi trupin e Ashley Tisdale. Fotoja, e cila tashmë nuk ndodhet në profilin e tij, nuk i ka shpëtuar shumë mediave të cilat e kanë përshkruar atë deri në detaje.
Sipas People, në imazh ai shfaqet i ulur në një divan pranë një bime, i veshur me të zeza dhe me syze me xhama rozë. Fotos i ishte shtuar logoja e "The Cut" dhe një titull ironik:
“Kur je personi më egoist dhe më i shkëputur nga realiteti në botë, nënat e tjera priren ta zhvendosin vëmendjen te fëmijët e tyre”, me nëntitullin:
“Rrëfim për një grup nënash, nga këndvështrimi i një babai.”
“Lexoni intervistën time të re me '@TheCut',” shkroi Koma në mbishkrimin e postimit.
Postimi u duk si një sulm i drejtpërdrejtë ndaj esesë personale të Ashley Tisdale, e publikuar më 5 janar.
Në shkrimin e saj, ajo nuk përmend emra dhe e përshkruan përvojën si një mësim fuqizues, duke theksuar se është në rregull të largohesh nga marrëdhëniet që nuk ndihen më të shëndetshme.
“Nëse një grup nënash të bën vazhdimisht të ndihesh e lënduar, e rraskapitur ose e përjashtuar, atëherë ai nuk është grupi i duhur për ty,” shkruan Tisdale. “Të zgjedhësh të largohesh nuk të bën të keqe apo paragjykuese. Të bën të ndershme me veten. Miqësitë, si çdo marrëdhënie tjetër, kanë stinët e tyre.”
Eseja e Tisdale në "The Cut" u publikua një muaj pasi postimi i saj në blog, në dhjetor 2025, me titull "Ke të drejtë të largohesh nga grupi yt i nënave", u bë viral. Në të, ajo shkruante se, pas lindjes së fëmijës, kishte kërkuar lidhje dhe mbështetje, por përjetoi sjellje tipike të “vajzave të liga”, që e kthyen grupin në një ambient toksik.
