Paris Hilton prej kohësh po tregon ngjarje nga e shkuara e saj dhe rishtazi, ka treguar se ka pasur një marrëdhënie speciale me një mësues, në klasë të tetë, kur ndiqte studimet në shkollën katolike.
Hilton tha se të gjithë e kishin qejf mësuesin e ri dhe të pashëm. “Të gjithë e donin, edhe murgeshat”, u shpreh ajo dhe pranoi se as ajo nuk bënte përjashtim. Mësuesi ia kishte kthyer pëlqimin.
Paris tha gjithashtu: “Ai më bënte të ndihesha e rëndësishme, në një mënyrë të rriturish. Ai më joshte dhe më thoshte se vajzat e tjera flisnin pas shpine, sepse ishin xheloze për mua”. Më pas, ai i kërkoi numrin dhe i tha të mos i tregonte njeriu.
Hilton u shpreh se mësuesi e telefononte pothuajse çdo natë dhe flisnin prej orësh për pjekurinë, bukurinë, inteligjencën, sensualitetin, si dhe sa e keqkuptuar dhe speciale ishte ajo. Sipas Paris, në shumë raste, mësuesi e pyeste nëse i kishte prindërit në shtëpi dhe një natë kur ata nuk ishin, ai shkoi drejt shtëpisë së saj.
Ajo rrëfeu se pa makinën e tij, shkoi në sediljen e pasagjerit dhe u puthën për shumë gjatë dhe në mes rrezikut se do të përfundonte në diçka më shumë, e kapën prindërit me mësuesin. Ai u përpoq të ikte dhe fajësoi Paris për sjelljen e tij. “Jeta ime mbaroi. Ç’po bëj? Pse më detyrove ta bëj këtë?”, ishte shprehur mësuesi.
42-vjeçarja tha se ajo shkoi në shtëpi dhe u përpoq të bënte sikur s’dinte gjë para prindërve, por nuk funksionoi. Ajo tha se edhe pse kurrë nuk e rrëfeu ngjarjen, sërish, njerëzit në shkollë dinin diçka, por nuk është në dijeni nëse mësuesi u përball ndonjëherë me pasojat e veprimeve të tij.
“Edhe tani, me mendjen e një të rriture, edhe pse e di se një fëmijë nuk mund të fajësohet për sjelljet e adultëve, sërish fytyra po më digjet (nga sikleti) që po ndaj këtë sekret të tmerrshëm”, përfundoi ajo.
Artikuj të sugjeruar:
