Travis Decker, babai i tre vajzave të mitura që u gjetën të pajeta më 2 qershor në shtetin e Uashingtonit, është ende në arrati dhe po kërkohet intensivisht nga autoritetet. Ai dyshohet se vrau vajzat e tij – 9 vjeç, 8 vjeç dhe 5 vjeç – gjatë një vizite të rregullt prindërore.

Avokatja e ish-bashkëshortes së tij, Whitney Decker, deklaroi për ABC News se Travis “nuk tregoi asnjë shenjë paralajmëruese” para zhdukjes dhe se “i donte shumë vajzat e tij”. Avokatja shtoi se ai kishte qenë një “baba aktiv” dhe se ndonëse kishte probleme me shëndetin mendor pas shërbimit ushtarak, marrëdhënia me ish-gruan kishte qenë e qetë dhe bashkëpunuese.

Trupat e vajzave u gjetën pranë makinës së babait të tyre, pas disa ditësh kërkimi. Sipas raportit paraprak të mjekësisë ligjore, vajzat dyshohet të kenë vdekur nga asfiksimi.

Travis Decker u nda nga gruaja e tij në vitin 2023. Pas divorcit, ajo fitoi kujdestarinë e plotë të vajzave, ndërsa atij iu lejuan vizita të kufizuara – tre orë çdo të premte dhe tetë orë çdo fundjavë të dytë, me kusht që të mos largohej nga zona e afërt e banimit të tyre. Këto masa u morën për shkak të shqetësimeve për gjendjen e tij mendore.

Sipas avokates, “diçka u thye brenda tij” pas vendosjes së kufizimeve, duke e përshkruar aktin si një shpërthim i errët që lidhet me traumat dhe përgatitjen ushtarake që kishte marrë.

Policia ka publikuar imazhe të fundit të Decker dhe ka ndërmarrë një operacion të gjerë kërkimi në terrenet malore të rajonit. Rajoni i njohur turistik, “The Enchantments”, është mbyllur deri më 18 qershor ose deri në një njoftim të dytë. Autoritetet paralajmërojnë se Decker është i aftë të mbijetojë për ditë të tëra në natyrë pa pajisje, pasi ka trajnim të avancuar për mbijetesë nga shërbimi në ushtri.

Banorëve në zonat malore pranë u është kërkuar të mbajnë dyert dhe dritaret të mbyllura dhe të njoftojnë menjëherë nëse kanë ndonjë informacion.

Ndërkohë, një faqe GoFundMe është hapur për të ndihmuar Whitney Decker me shpenzimet dhe mbështetjen ligjore pas kësaj tragjedie të rëndë. Deri më sot ajo ka mbledhur mbi 1 milion dollarë.

Artikuj të sugjeruar:

_{Burimi: People}