Freddie Mercury, legjenda që mahniti skenat botërore me zërin dhe karizmën e tij, ka lënë pas një trashëgimi shumë më të thellë sesa vetëm muzikën. Një biografi e re me titull “Love, Freddie” nga autorja e njohur Lesley-Ann Jones sapo ka zbuluar një fakt që askush nuk e priste: Freddie Mercury kishte një vajzë, e cila ka qëndruar në hije për 48 vite.

Vajza, e identifikuar vetëm si “B”, është sot një grua 48-vjeçare, nënë dhe profesioniste në fushën e mjekësisë që jeton në Europë, larg vëmendjes së publikut. Ajo rrëfen se ka pasur një marrëdhënie të ngushtë dhe të dashur me të atin deri në fundin e jetës së tij në vitin 1991.

Në një letër të shkruar me dorë, e përfshirë në kapitullin e parë të librit, ajo thotë:

“Freddie Mercury ishte dhe është babai im. Më ka dashur me gjithë shpirt dhe më ka trajtuar si thesarin më të çmuar që kishte.”

Zbulimi është bërë përmes një letre personale dhe 17 ditarëve të shkruar nga vetë Freddie Mercury, që “B” i ruajti me fanatizëm për dekada të tëra dhe ia dorëzoi autores për botim. Vetëm një rreth shumë i ngushtë e dinte të vërtetën: Mary Austin – dashuria më e madhe e jetës së Freddie-t, prindërit e tij dhe motra. As disa nga njerëzit më të afërt në ekipin e tij nuk kishin dijeni.

Sipas librit, “B” lindi në vitin 1976 si fryt i një marrëdhënieje të papritur mes Freddie-t dhe gruas së një miku të tij të ngushtë, ndërsa burri i saj ndodhej jashtë shtetit për punë. E ëma ishte katolike dhe aborti nuk ishte asnjëherë një opsion. Kështu, fëmija u rrit nga ajo dhe bashkëshorti i saj, ndërsa Freddie Mercury ishte gjithmonë pjesë e jetës së saj. Ai kishte dhomën e tij në shtëpinë ku ajo jetonte dhe e vizitonte shpesh.

Në një tjetër letër të përfshirë në libër, “B” shkruan:

“Jeta që kam me burrin dhe familjen time në një vend tjetër është jashtëzakonisht private. Ne e duam qetësinë tonë dhe duam ta mbajmë kështu. Askush nuk ka nevojë të dijë kush jam.”

Autorja Jones, e cila ka shkruar më parë për John Lennon dhe Rolling Stones, fillimisht e pranon se ishte skeptike. Por pas verifikimit të letrave, ditarëve dhe mungesës totale të interesit nga ana e “B” për famë apo para, ajo tha:

“Kjo grua nuk është një trillim. Nuk ka kërkuar asgjë, as publicitet, as trashëgimi. Ka jetuar me dinjitet dhe larg syrit të medias. Edhe Mercury kishte bërë një marrëveshje ligjore për të siguruar mirëqenien e saj, jashtë testamentit publik.”

Nga letrat dhe kujtimet e ruajtura, portretizohet një Freddie shumë më ndryshe nga figura publike që njohim. Ai ishte i përkushtuar si prind, fliste çdo ditë me vajzën e tij gjatë dhe e ka mbajtur gjithmonë lidhjen me të.

“Ai nuk ishte njeriu që publiku mendonte se ishte,” thotë Jones.

Kjo histori hedh një dritë krejt tjetër mbi jetën e Freddie Mercury-t. Përtej performancave ekstravagante dhe zërit që sfidonte çdo standard, qëndronte një burrë që e jetoi një dashuri të fshehtë, të thellë dhe të pastër — një dashuri prindërore që askush s’e dinte.

Nëse kjo nuk është historia më befasuese e momentit, nuk e dimë çfarë është. Në fund të fundit, edhe legjendat kanë sekrete – dhe ndonjëherë ato janë më të fuqishme se çdo këngë që kanë kënduar ndonjëherë.

Artikuj të sugjeruar:

_{Burimi: Page Six}