Parashikimi i rezultatit të konklavës papnore, e cila zhvillohet në mënyrë tejet sekrete, është pothuajse i pamundur, pasi pozicionet e kardinalëve ndryshojnë gjatë raundeve të votimit. Në konklavën e fundit, në vitin 2013, pak njerëz parashikuan se Jorge Mario Bergoglio do të zgjidhej si Papa Françesku. Aktualisht, spekulimet janë përqendruar te këta pretendentë, si pasues të mundshëm të tij:
 
Pietro Parolin, 70 vjeç, Itali

I konsideruar si një “kandidat i vazhdimësisë” së Françeskut, Parolin ka qenë i afërt me Papën e ndjerë. Ai është në rolin e Sekretarit të Shtetit në Vatikan që nga viti 2013 dhe ka luajtur rol kyç në çështjet diplomatike, përfshirë negociata të ndjeshme me Kinën dhe qeveritë në Lindjen e Mesme. Konsiderohet përfaqësues i besueshëm i Papës nga diplomatët laikë.
 
Në vitin 2018, ishte forca shtytëse pas një marrëveshjeje të diskutueshme me qeverinë kineze për emërimin e disa prej peshkopëve, që disa e kritikuan si një dorëzim ndaj regjimit komunist. Kritikët e Parolin-it e shohin si modernist dhe pragmatist që vendos ideologjinë dhe zgjidhjet diplomatike mbi të vërtetat e vështira të besimit. Për mbështetësit e tij, ai është një idealist i guximshëm dhe përkrahës i paqes.
 
Luis Antonio Tagle, 67 vjeç, Filipine

Tagle, ish-arqipeshkv i Manilës, do të ishte Papa i parë aziatik, nga një rajon me rritjen më të shpejtë të popullsisë katolike. Për një periudhë, ai konsiderohej si pasardhësi i preferuar i Françeskut dhe një kandidat i fortë për të vazhduar axhendën progresive të tij, por kohët e fundit duket se ka humbur ndikimin. Ai është shprehur se qëndrimi i kishës ndaj çifteve homoseksuale dhe të divorcuar është tepër i ashpër, por ka kundërshtuar të drejtën për abort në Filipine.
 
Peter Turkson, 76 vjeç, Gana

Turkson do të ishte Papa i parë me ngjyrë pas shumë shekujsh. Ka qenë zë i fortë për çështje si kriza klimatike, varfëria dhe drejtësia ekonomike, ndërsa ka mbështetur pozicionet tradicionale të kishës për priftërimin, martesën mes një burri dhe një gruaje, si dhe homoseksualitetin. Megjithatë, qëndrimet e tij mbi këtë të fundit janë zbutur dhe ai ka argumentuar se ligjet në shumë vende afrikane janë tepër të ashpra. Ka qenë një kandidat i zëshëm kundër korrupsionit dhe në mbështetje të të drejtave të njeriut.
 
Robert Francis Prevost, 69 vjeç, SHBA

 
Megjithëse Vatikani është prej kohësh kundër idesë së një Pape amerikan për shkak të statusit superfuqisë së SHBA-së dhe ndikimit të saj laik global, Prevost, është një kandidat i moderuar, i lindur në Chicago. U emërua kardinal nga Françesku në vitin 2023 dhe ka qenë më parë udhëheqës i Urdhrit Augustinian. Papa e emëroi gjithashtu në Dikasterin për Peshkopët, që mbikëqyr përzgjedhjen e peshkopëve në të gjithë botën. Roli i tij i lartë, i kombinuar me përvojën si misionar në Peru, ku ka shërbyer si ipeshkv në Chiclayo, mund të ndihmojë në zbutjen e kundërshtimeve ndaj një Pape amerikan.
 
Péter Erdò, 72 vjeç, Hungari

 
Një nga kandidatët kryesorë konservatorë, Erdò ka qenë mbështetës i fortë i mësimeve tradicionale katolike dhe doktrinës. Ai do të përfaqësonte një largim të madh nga qasja e Françeskut. Është i njohur si intelektual dhe njeri i kulturës. Erdò ishte i preferuar nga kardinali i ndjerë George Pell, i cili besonte se ai do të rivendoste sundimin e ligjit në Vatikanin pas Françeskut. Në vitin 2015, Erdò dukej se u rreshtua me idenë e kryeministrit nacionalist hungarez, Viktor Orbán, ku kundërshtoi edhe thirrjen e Françeskut që kishat të pranonin emigrantët.
 
Matteo Zuppi, 69 vjeç, Itali

 
I emëruar kardinal nga Françesku në vitin 2019, Zuppi konsiderohet si pjesë e krahut progresiv të kishës dhe pritet të vazhdojë trashëgiminë e Françeskut, duke ndarë shqetësimin e tij për të varfrit dhe të margjinalizuarit.
 
Është (relativisht) liberal për marrëdhëniet e çifteve homoseksuale. Para dy vitesh, Françesku e emëroi të dërguar për paqe për Ukrainën dhe në këtë rol vizitoi Moskën për të “nxitur gjeste humaniteti”. Aty u takua me kreun e kishës ortodokse ruse dhe aleat të Putinit. Gjithashtu, është takuar me presidentin ukrainas Volodymyr Zelenskyy.
 
José Tolentino Calaça de Mendonça, 59 vjeç, Portugali

Tolentino është një nga pasuesit më të rinj të mundshëm të Françeskut. Ai ka ngjallur polemika për qëndrimet tolerante ndaj marrëdhënieve homoseksuale dhe për aleancën me feminizmin, që mbështet të drejtat e grave dhe është pro zgjedhjes (abortit). Ka qenë i afërt me Françeskun në shumicën e çështjeve dhe argumenton se kisha duhet të angazhohet me kulturën moderne.
 
Mario Grech, 68 vjeç, Maltë

Grech është parë si tradicionalist, por pas zgjedhjes së Françeskut në vitin 2013 ka përqafuar qëndrime më progresive. Mbështetësit e tij argumentojnë se ndryshimet në qëndrimet e tij tregojnë aftësi për rritje dhe zhvillim. Ka kritikuar liderët politikë europianë që kanë kërkuar të kufizojnë aktivitetin e organizatave jofitmprurëse.
 
Pierbattista Pizzaballa, 60 vjeç, Itali

Që nga viti 2020, Pizzaballa ka qenë një rol kyç në mbrojtjen e minoritetit të krishterë në Jerusalem. Pas sulmit të Hamasit ndaj Izraelit më 7 tetor 2023, Pizzaballa ofroi veten si “peng” në këmbim të fëmijëve të mbajtur në Gaza. Ai vizitoi Gazën në maj 2024 pas muajsh negociatash. Pritet të vazhdojë disa aspekte të udhëheqjes së Françeskut, por ka dhënë pak deklarata publike për çështje të diskutueshme.
 
Robert Sarah, 79 vjeç, Guine

Sarah është kardinal tradicional dhe ortodoks që në një periudhë u përpoq të paraqitej si një “autoritet paralel” ndaj Françeskut. Në vitin 2020, ishte bashkëautor në një libër me ish-papën Benedikt në mbrojtje të celibatit të klerit, botimi i të cilit u pa si një sfidë ndaj autoritetit të Françeskut. Ka denoncuar “ideologjinë gjinore” si kërcënim për shoqërinë dhe ka folur kundër fundamentalizmit islamik. Ashtu si Turkson, ai mund të bënte histori si Papa i parë me ngjyrë pas shekujsh.

Artikuj të sugjeruar:

 Burimi: The Guardian