Papa Françesku ka ndërruar jetë në moshën 88-vjeçare.
Ai dha frymën e fundit të hënën e Pashkëve, 21 prill, në moshën 88-vjeçare, në rezidencën e tij në Casa Santa Marta të Vatikanit.
“Në orën 7:35 të mëngjesit të sotëm (me orën lokale), peshkopi i Romës, Françesku, u kthye në shtëpinë e Atit. E gjithë jeta e tij iu kushtua shërbimit të Zotit dhe Kishës së Tij.”, thuhet në reagimin zyrtar të Vatikanit.
Ceremonia e varrimit do të mbahet në Bazilikën e Santa Maria Maggiore në Romë, sipas dëshirës së tij.
Vdekja e tij vjen më pak se 24 orë pasi ai u shfaq në sheshin e Shën Pjetrit të Vatikanit për të dielën e Pashkëve.
Ai doli në një karrocë me rrota dhe bëri me dorë nga ballkoni i Bazilikës së Shën Pjetrit drejt turmave të njerëzve dhe tha: "Të dashur vëllezër dhe motra, Gëzuar Pashkët".
Ai u zgjodh në krye të Kishës Katolike në mars të vitit 2013 pasi Papa Benedikti XVI u largua nga pushteti. Ai ishte Papa i parë nga Amerika Latine. Që kur Gregori III, i lindur në Siri, ndërroi jetë vitin në 741, nuk pati më një peshkop joevropian, derisa Papa Françesku u zgjodh .
Ai ishte gjithashtu jezuiti i parë që u zgjodh në fronin e Shën Pjetrit - Jezuitët shiheshin historikisht me dyshim nga Roma.
Gjatë pontifikatit të tij, ai u angazhua për reformimin e Kishës, mbrojtjen e të varfërve dhe dialogun ndërfetar.
