Të kërkosh falje është një akt i vogël me peshë të madhe - mund të rregullojë marrëdhënie ose t’i thellojë më shumë plagët. Por shumë njerëz mendojnë se kanë kërkuar falje, ndërkohë që në realitet s’kanë bërë asgjë tjetër veçse e kanë ngatërruar edhe më keq situatën.

Po kërkove vërtet të tregohesh i/e sinqertë dhe të përmirësosh një situatë të pakëndshme, mbaj parasysh këto 5 gabime që bëhen shpesh dhe sigurohu t’i shmangësh.

1. Falje pa përmbajtje: “Më vjen keq që u ndjeve ashtu”

Kjo nuk është kërkesë faljeje. Në fakt, është mënyra më pasive për të shmangur përgjegjësinë. Çfarë ke bërë konkretisht që solli atë ndjesi? Nëse nuk thuhet, nuk ekziston.

Edhe shprehje si “Më vjen keq që të lëndova” mund të jenë të paplota, sepse vendosin emocionin në qendër, jo veprimin e gabuar.

2. Fajësimi i tjetrit: “Më vjen keq që…, por ti duhej të...”

Nëse e fillon me “më vjen keq” por më pas e kalon topin te personi tjetër, s’je duke kërkuar falje - je duke shmangur përgjegjësinë.

Nëse ka gjëra që duhen diskutuar, bëje pasi ke kërkuar falje, jo gjatë faljes.

3. Arsyetime të menjëhershme:

“Më vjen keq, por kam qenë shumë i/e zënë dhe në gjendje jo të mirë. Kam kaluar një periudhë të vështirë.”

Jo, kjo nuk është kërkim faljeje - është justifikim.

Kërkimi i faljes duhet të vijë i pastër, pa “por”. Mund t’i shpjegosh arsyet më vonë, pasi ke treguar që e kupton gabimin.

Provo këtë:

“Të falënderoj që prite kërkesën time për falje. Dua të dish që kohët e fundit kam qenë shumë i/e stresuar, por kjo nuk justifikon veprimin tim. Thjesht doja ta dije.”

4. Mungesë ndjeshmërie për pasojat:

Të kërkosh falje nuk do të thotë vetëm të pranosh gabimin, por edhe të tregosh që e kupton si ndikon ai tek tjetri.

Pyet veten: Si mund të jetë ndjerë ai person? Si ndikoi kjo në marrëdhënien tonë? Nëse nuk je i/e sigurt, mos supozo. Pyet.

5. Kërkimi i faljes me kusht: “Më fal tani!”

Faleminderit për sinqeritetin, por të kërkosh ose të presësh falje në mënyrë automatike është një tjetër gabim. Askush nuk është i detyruar të të falë. Të falësh kërkon kohë, ndjeshmëri dhe dëshirë dhe asnjë nga këto nuk vjen me kërkesë.

Mos thuaj:

“Duhet të më falësh.”

“Do ndihesh më mirë nëse më fal.”

Thjesht kërko falje dhe lëre personin tjetër të vendosë çfarë bën me atë ndjesi. Falja e vërtetë nuk ndodh me ultimatum.

Në fund të ditës kërkimi i faljes nuk është vetëm “më vjen keq”. Është një proces që kërkon qartësi dhe empati. Nëse s’ke ndërmend t’i përfshish këto, ndoshta s’je gati të kërkosh falje!

Burime: Psychology Today