Foto: Geljant Kaleci

Nga personazhi në $NOB te marrëdhënia me aktorët e tjerë, Todi Kasemi iu përgjigj disa prej pyetjeve të ndjekësve në Instagramin e @snob_tvseries.

Në $NOB, Todi luan rolin e Francit, një djali të pasur i cili ka parë se si fitohet leku në familjen e tij me intriga e pazare. Ai kërkon të shkëputet nga hija e të atit, një politikan i njohur, por nuk e di se si ta kërkojë këtë pavarësi, sepse gjithë çfarë ka e di, është shumë e lidhur me zgjedhjet e të atit.

Personazhi i Francit është konsideruar nga shumë shikues të $NOB si një personazh toksik përsa i përket raportit të tij me Xhesikën, megjithatë, Todi vështirë ta urrejë. “Nëse do më pyesje një vit më përpara se çfarë urreja tek personazhi i Francit do të të listoja shumë gjëra. Sot jam mësuar me personazhin e Francit dhe unë atë e pëlqej shumë. Nuk e urrej dot sepse justifikoj çdo veprim të tij, sepse në atë mënyrë është edukuar,” u shpreh aktori.

Roli i një djali arrogant dhe kokëfortë ishte i vështirë për Todin, ndonëse nuk luante për herë të parë një karakter të ngjashëm. “Nuk është hera e parë që më është dashur të luaj një personazh arrogant, kokëfortë, por Franci ishte nivel krejt tjetër. Më është dashur shumë punë me [skenaristen dhe krijuesen] Dalina Buzin, [regjisorin] Redi Treni, [pedagogen] Sonila Kapedanin. Mund të them që kam punuar rreth 7-8 muaj mbi këtë personazh,” tha ai.

Todi shtoi se e ka ndihmuar edhe fakti që nuk e ndryshon dialektin e tij në mënyrë që Franci të vijë sa më origjinal.

Patjetër që nuk munguan pyetjet për Xhesikën dhe aktoren që luan rolin e saj, Megli Haskaj. “Të punosh me Meglin është super gallatë. Megli ka sens humori, gjë që mua më ka bërë të ndihem shumë mirë. Me të vërtetë jam kënaqur,” tha ai. Po Xhesika? Pyetjes “a e do vërtet Franci Xhesikën?” ai nuk preferoi ta zbulonte. “Është diçka që nuk mund ta them pasi do e zbuloni në episodet e ardhshme të $NOB.”

Fakti që është shumë i mirë dhe shumë i keq në të nëjtën kohë, e bën personazhin e Francit një karakter që shumë e urrejnë dhe e pëlqejnë njëkohësisht.

Për të tjera intervista pyetje-përgjigje me ndjekësit në rrjete sociale, klikoni mbi emrat përkatës: Ketjona Pecnikaj (Tesa), Gent Disha (Albani), Olta Beqiri (Kristela), Megli Haskaj (Xhesika), Brarend Akçiu (Bojken), Elios Shuli (Joan), Altea Lazaj (Sara).