Nga personazhi në $NOB, kënga e deri te e dashura, Gent Disha iu përgjigj disa prej pyetjeve të ndjekësve në Instagramin e @snob_tvseries.
Në $NOB, Genti luan rolin e Albanit, një djali të cilit jeta i mësoi që fëmijë që të mos i besonte njeriu. I rritur në një familje të varfër dhe i apasionuar pas boksit, ai i provoi në kurriz gënjeshtrat dhe padrejtësitë dhe kuptoi se i pafuqishëm, do ta ketë gjithmonë luftën e humbur ndaj më të pasurve/fortëve. Ndonëse ka shumë për të zbuluar për personazhin e tij, njerëzve u ka pëlqyer si karakter, sidomos për raportin që ka me Tesën (Ketjona Pecnikaj).
View this post on Instagram
“Sa ka ndikuar Albani në jetën tënde të përditshme?” ishte një prej pyetjeve, të cilës Genti iu përgjigj: “ Në jetën time të përditshme nuk ka ndikuar, por ka ndikuar në procesin tim të punës si aktor, si është trajtuar si personazh dhe kam mësuar shumë gjëra.”
Ketjona Pecnikaj dhe Gent Disha
Ai shtoi se “i pëlqen shumë karakteri i Albanit se është një person që do të çajë vetë në jetë, prandaj ka përplasje me Tesën”, një personazh të cilën në jetën e përditshme nuk do të donte ta kishte të dashur. “Mendimi im si Gent është që një lidhje duhet të jetë e barabartë dhe jo që dikush të dominojë dhe të jetë më kontrollues,” tha ai.
Genti zbuloi edhe një detaj për personazhin – pasi dikush e pyeti se në një pjesë Tesa e shpoi me gjilpërë – se “ajo është insulinë. Albani është me diabet”.
Përsa i përket evolimit të karakterit të Albanit në $NOB, përfshirë këtu edhe raportin me Tesën, aktori shtoi: “Albani nuk tallet me Tesën. Ai e do shumë, por ka hyrë në një rrugë që është e vështirë dhe ai do të gjejë veten”.
Duke qenë se shumë ndjekës e njohin Gentin edhe si këngëtar – fitues i vendit të parë në “Jeho” në Top Channel dhe pjesëmarrës në “Këngën Magjike” – nuk kishin si të mungonin pyetjet për këngën. “Nuk do të këndoj në serial. Siç e keni parë, Albani nuk këndon, por është boksier,” tha ai megjithëse zbuloi se “e kemi bërë një këngë” e cila mbetet surprizë.
Disa të tjerë shkuan më tej me pyetjet. “A ke të dashur dhe nëse jo, ku aplikohet?” pyeti dikush. “Nuk kam dëshirë t’u përgjigjem këtyre pyetjeve. Përsa i përket pyetjes tjetër, di të them që nuk aplikohet,” tha Genti. Përgjigjja e fundit është e hapur për diskutim.
Për të tjera intervista pyetje-përgjigje me ndjekësit në rrjete sociale, klikoni mbi emrat përkatës: Ketjona Pecnikaj (Tesa), Olta Beqiri (Kristela), Brarend Akçiu (Bojken), Megli Haskaj (Xhesika), Elios Shuli (Joan).
Artikuj të rekomanduar:
- Si mund ta shihni $NOB kudo dhe kurdo: Njihuni me platformën e re
- Brarend Akçiu dhe Olta Beqiri tregojnë për aktrimin, komentet dhe pritshmëritë për $NOB
- Ketjona Pecnikaj dhe Megli Haskaj flasin për $NOB
- Dalina Buzi për $NOB: 'Sfida më e madhe ka qenë ky projekt'
- $NOB, një tjetër standard për kinematografinë shqiptare
