Ish-kryeministri japonez Shinzo Abe nuk ka mundur t'i shpëtojë plagëve të marra pas atentatit dhe ka ndërruar jetë në spital. Abe, 67-vjeç është qëlluar me armë zjarri teksa mbante një fjalim gjatë fushatës që po zhvillonte në qytetin Nara.
Gjatë një konference për shtyp, mjekët thanë se u përpoqën për 4 orë e gjysmë ta shpëtonin Abe, por gjatë ndërhyrjes nuk mundën t'i gjenin dy plumbat që mendohet se e kanë goditur në anën e djathtë të qafës si dhe pranë zemrës.
Shinzo Abe ka qenë kryeministri që ka shërbyer më gjatë në Japoni, për t'u larguar nga posti në 2020 pas problemeve me shëndetin. Edhe pas dorëheqjes, ish-kreu i Japonisë kishte ndikim të madh në qeverinë aktuale. Përshembull, kur Rusia nisi pushtimin në Ukraineë, Abe doli publikisht dhe tha se Japonia ka nevojë të rrisë shpenzimet e saj për ushtrinë.
Pas lajmit të vdekjes, të gjithë liderat botërorë kanë nisur ngushëllimet e tyre për ish-kryeministrin, të shokuar nga ngjarja tragjike.
Të tilla sulme janë ekstremisht të rralla në Japoni, dukuri e cila e bën edhe më të rëndë atë ç'ka ndodhi. Përsa i përket autorit, policia ka arrestuar si të dyshuarin kryesor për sulmin një 41-vjeçar.
Burimi: BBC
