Izraeli synon të ndalojë ndihmat humanitare për Gazën Veriore
Një zyrtar izraelit, në kushte anonimiteti, tha për agjencinë Associated Press se Izraeli po synon të ngadalësojë ose ndalojë hyrjen e ndihmave humanitare në Gazën Veriore.
Kjo ndodh në kohën kur Izraeli ka nisur një fushatë të zgjeruar ushtarake në qytetin e Gazës, e cila u paralajmërua më herët këtë muaj dhe u kritikua gjerësisht ndërkombëtarisht.
Të premten, Izraeli e shpalli qytetin e rrethuar një “zonë lufte” dhe pretendoi se rrjeti i tuneleve të Hamasit vazhdon të ekzistojë, pavarësisht disa operacioneve të mëdha që janë zhvilluar gjatë fushatës 23-mujore.
Sipas mediave të ndryshme, autoritetet spitalore raportuan se të paktën 50 palestinezë u vranë në sulmet izraelite të së shtunës, përfshirë 26 në qytetin e Gazës.
Vritet në Lviv ish-kryetari i parlamentit të Ukrainës, Andriy Parubiy
Një politikan i njohur ukrainas dhe ish-kryetar i parlamentit, Andriy Parubiy, u qëllua për vdekje të shtunën në qytetin perëndimor të Lvivit, sipas disa mediave vendase.
Policia lokale njoftoi në Telegram se rreth mesditës kishte marrë një telefonatë për një incident me armë në distriktin Frankivskyi të qytetit. Ata nuk konfirmuan menjëherë identitetin e viktimës, por thanë se ai kishte vdekur në vendngjarje.
Presidenti Volodymyr Zelensky më vonë konfirmoi vrasjen në rrjetin X, duke e quajtur një “vrasje të tmerrshme.”
Hungaria refuzon të nënshkruajë deklaratën e BE-së kundër sulmit rus
Hungaria ka refuzuar të firmosë një deklaratë të Bashkimit Europian që dënonte sulmin më të fundit të Rusisë ndaj Ukrainës. Dokumenti, i përgatitur nga Përfaqësuesja e Lartë Kaja Kallas, u mbështet nga 26 shtetet e tjera anëtare.
Të mërkurën në mbrëmje, Rusia goditi kryeqytetin ukrainas, duke vrarë 23 persona, mes tyre edhe disa fëmijë. Ky është sulmi i dytë më i madh ajror që nga fillimi i agresionit të plotë rus ndaj Ukrainës.
Gjithashtu, u dëmtuan zyra e përfaqësimit të BE-së në Kiev dhe ndërtesa e British Council. Në deklaratë thuhej se rrezikimi i jetës së diplomatëve është shkelje e ligjit ndërkombëtar.
Gjykata amerikane: Trump e tejkaloi autoritetin me tarifat tregtare
Një gjykatë federale amerikane vendosi të premten se presidenti Donald Trump nuk kishte të drejtë ligjore për të vendosur tarifa të gjera tregtare, duke dalë në përfundimin se ai e tejkaloi autoritetin që i jep ligji për emergjenca.
Megjithatë, Gjykata e Apelit për Qarkun Federal vendosi të lejojë që tarifat të qëndrojnë në fuqi deri në mes të tetorit, për t’i dhënë administratës kohë të apelojë vendimin në Gjykatën e Lartë.
Duke reaguar ndaj vendimit, Trump tha se do ta apelojë.
“Nëse ky vendim mbetet në fuqi, do të shkatërronte Amerikën,” shkroi ai në platformën e tij sociale.
