Nga sot deri më 11 shtator, maturantët e shpallur fitues në universitetet publike dhe jopublike do të mund të regjistrohen në fakultetet përkatëse, përmes shtatë fazave 48-orëshe.
Ministrja e Arsimit dhe Sportit, Ogerta Manastirliu, ka rikujtuar hapat që të rinjtë duhet të ndjekin për t’u regjistruar në degën e dëshiruar.
Çdo maturant fitues ka në dispozicion dy ditë kohë për t’u regjistruar. Nëse nuk regjistrohet brenda afatit, vendi i tij i kalon automatikisht një kandidati në pritje.
Pas përfundimit të fazave të regjistrimit, do të hapet edhe një periudhë çregjistrimi, për ata që dëshirojnë të ndryshojnë degën dhe të rikthehen në garë për raundin e dytë të pranimeve.
Sipas të dhënave nga Rrjeti Akademik Shqiptar (RASH), programet më të preferuara këtë vit janë ato në teknologji dhe inxhinieri, të ndjekura nga mjekësia. Ndërkohë, programet e mësuesisë vijojnë të jenë më pak të kërkuarat, me një përqindje që nuk kalon 7.5%, duke ruajtur të njëjtin trend si vitet e kaluara.
Një rritje është vënë re edhe në aplikimet për degët profesionale, të cilat po tërheqin gjithnjë e më shumë të rinj.