Prej disa kohësh, që nga konferenca e organizatorëve të Top Music Awards, u përfol mungesa e këngës “Shake it” nga Genta Ismajli dhe grupi Etnon, në klasifikimin e këtij festivali. E ardhur fillimisht si një pyetje nga kryeredaktori i revistës “Who”, Eraldo Rexho, çudia e mungesës së Gentës u përforcua edhe nga vetë menaxheri i saj, Adem Ramadani.
“Pasi analizuam çdo gjë, vendosëm që paraprakisht t’u bëjmë me dije atyre se kënga është materiali më i dëgjuar i momentit në çdo vend ku shqiptarët jetojnë,” ka thënë ai për portalin Blitz.al duke thënë se ndihet i fyer nga shpërfillja që i është bërë kësaj kënge me 16 milionë klikime dhe e sheh si një konflikt personal, injorimin që i është bërë.
“Pasi pamë mungesën e këngës, atëherë e kuptuam si konflikt personal ndaj nesh dhe vazhdojmë t’i qëndrojmë kësaj ideje deri në momentin që nga ana e tyre nuk ka sqarime. Nga një kontakt që kam pasur me Ledion Liçon, ai më ka thënë shkurt: ‘Thjesht nuk mendojmë se ka arritur atë pikë mjaftueshëm'. Në një lloj forme ata kanë fyer mbarë publikun shqiptar duke shpërfillur shijet e tij apo edhe mediat e tjera, të cilat i kanë dhënë këngës hapësirë të jashtëzakonshme. Gjithsesi, ne vazhdojmë t’i trajtojmë me respekt,” ka thënë Ramadani. Por, i kontaktuar nga Anabel.al, autori dhe moderatori i Top Music Awards, Ledion Liço, sqaron se votat për këtë format, nuk varen nga klikimet në YouTube. “Ne nuk kemi asnjë interes personal që të heqim Gentën. Nëse ka 16 milionë klikime, këta 16 milionë fansa duhet të vijnë të votojnë në faqen e Top Music Awards,” ka thënë ai.
Që një artist të klasifikohet në një nga kategoritë e Top Music Awards, fillimisht duhet të propozohet nga publiku që e dërgon propozimin tij në hapësirën “Dërgoni propozimin tuaj në Top Awards”. Këto propozime, kombinohen edhe me ato të bordit të festivalit, i cili sipas Liços, “tenton që të përfshijë edhe muzikë cilësore jo domosdoshmërisht komerciale.”
Në faqen e Top Music Awards, çdokush ka të drejtë të votojë një herë në javë nga një IP dhe votat zerohen sërish në krye të javës. Klasifikimet ndërrohen çdo javë dhe momentalisht, në javën e 8 majit, në krye qëndron kënga “Grande” e reperit Noizy, që ndiqet nga “Kings” e reperit Ledri Vula. Nata finale e Top Music Awards do të mbahet më 24 qershor në ambjentet e Pallatit t Koncerteve dhe do të transmetohet live në ekranin e “Top Channel”.
Copyright Anabel.al / Ndalohet ribotimi pa lejen e redaksisë.
