Arben Derhemi është rikthyer në skenë me “Magjia e Josef Bider dhe si pjesë e promovimit të shfaqjes, aktori dha një intervistë për “Trokit” në INTv. Ndër të tjera, ra në sy kjo deklaratë e Derhemit për një – ose disa – projekte kinematografike shqiptare që sipas tij po prishin shijet e publikut.
“Fatkeqësia e ndjek edhe televizionin, edhe filmin. Jo më larg se para ca kohësh patëm një event të çuditshëm, u shkul gjithë Shqipëria. S’e merr vesh njeri. Bën film një njeri që s’ka lidhje fare me teatrin me regjinë, me aktrimin. Vetëm kur dëgjon nga dikush, ‘a e ke parë atë filmin?’. Ti pyet kush është ky, se s’e njeh. ‘Është aktor,’ të thonë. Ndërkohë që ti se njeh se s’ka mbaruar as shkollë, asgjë. Mjafton të marrë ca lekë diku, të gjejë një sponsorizim. Bëjnë ca filma me luftë, me pistoleta,” thotë Derhemi.
Më pas, nga një film me luftë dhe pistoleta (?), Derhemi i referohet një komedie të përfolur shumë në rrjetet sociale. Hamendësoni vetë për kë mund ta ketë fjalën.
“Unë s’e di ckomedi është ajo. Kam parë rastësisht në Instagram skena që sinqerisht të bëjnë për të qarë, jo për të qeshur. Mënyra si është luajtur, si është trajtuar, mënyra si sheh dy aktorë që aktrojnë aty, të vjen për të qarë. Sepse vetëm aktrim s’është, regji s’është, skenar s’është. Për hir të asaj që duhet të bëjmë gjëra komerciale, le të bëjmë këtë.”
Aktori e mbyll me këto fjali goxha pesimiste:
"Është prishje e shijeve të publikut. Është më e keqe se cdo tjetër. Po demoralizohet gjithçka."
