Gjatë një episodi të shkurtër të programit “The Him & Her Show” të Dear Media të publikuar një ditë përpara intervistës së plotë, Paris Hilton flet hapur mbi përvojën e saj me ADHD-në dhe çrregullimin e njohur si Rejection Sensitive Dysphoria (RSD).
Shpjegim: ADHD është një gjendje që e bën të vështirë përqendrimin dhe të menduarit përpara se të veprosh.
RSD shkaktohet më së shumti prej ADHD-së, dhe është një gjendje e cila të bën të mos e përballosh mirë emocionalisht refuzimin dhe kritikën.
Paris Hilton tha se u diagnostikua zyrtarisht me ADHD në fund të të 20-ave. Gjatë intervistës ajo foli edhe mbi një tjetër çrregullim prej të cilit vuante, RSD, që lidhej me frikën dhe dhimbjen e madhe që shoqëron refuzimin.
"Është si të kesh një demon në mendjen tënde që të thotë vetëm gjëra jo të mira për veten," kështu e përshkruan ajo këtë çrregullim për të cilin mësoi edhe më shumë duke folur me të tjerë njerëz të cilët vuajnë nga ADHD.
"Kam kaluar kaq shumë sfida në jetën time, sidomos gjatë viteve 2000. Nga njëra anë ishte përballja me mediat, nga ana tjetër vuajtja që më shkaktonin këto dy çrregullime dhe e gjithë ajo periudhë ishte jashtëzakonisht e vështirë.”
Më tej ajo foli për vështirësitë dhe problemet që simptomat e ADHD-së i shkaktonin vite më parë, kur ishte ende fëmijë e thuajse askush sipas saj nuk fliste mbi këtë çrregullim.
"E kisha shumë të vështirë të mbaja mend gjëra. Shumicën e herëve humbisja detyrat e shtëpisë, gjë që më krijonte probleme me mësuesit."
Edhe pse në fillim zgjodhi të mos e ndante me askënd këtë problem, më vonë vendosi të fliste me të tjerë që kishin të njëjtat shqetësime si ajo.
"Ndihesha sikur kishte diçka që nuk shkonte me mua dhe trishtohesha, më pas thjesht shtiresha sikur çdo gjë shkonte mirë. Po përjetoja një sërë emocionesh dhe pasi fola me të tjerë njerëz që kishin ADHD, fillova të kuptoj më shumë mbi të. Është lodhëse të jetosh në atë mënyrë," tha Hilton.
