Izraeli dhe Hamasi përgatiten për bisedime në Egjipt, ndërsa rriten shpresat për një armëpushim
Izraeli dhe Hamasi po përgatiten për bisedime të mundshme në Egjipt të hënën, ndërsa shpresat për një armëpushim vazhdojnë të rriten pas sinjaleve nga kryeministri izraelit, Benjamin Netanyahu, se një marrëveshje për lirimin e pengjeve mund të shpallet këtë javë.
Delegacioni izraelit, i udhëhequr nga negociatori kryesor Ron Dermer, pritet të niset të hënën drejt Sharm el-Sheikh, sipas zyrës së Netanyahut.
Një zyrtar egjiptian tha se delegacioni i Hamasit ka mbërritur tashmë.
Netanyahu kritikon Europën për "nënshtrim ndaj terrorizmit palestinez"
Europa ka munguar në procesin për një plan armëpushimi mes Izraelit dhe Hamasit, sepse, sipas kryeministrit izraelit Benjamin Netanyahu, “në thelb është dorëzuar përballë terrorizmit palestinez dhe pakicave islamiste radikale”, tha ai në një intervistë.
“Për këtë arsye, Europa është bërë në thelb e parëndësishme dhe ka treguar dobësi të madhe,” tha Netanyahu, duke shtuar se ishte presidenti amerikan ai që mori drejtimin dhe iniciativën për një marrëveshje “realiste” për paqen.
Ai dënoi vendimin e 15 nga 27 vendet anëtare të BE-së për të njohur shtetin palestinez, duke e quajtur atë “një shpërblim maksimal për islamistët”.
Siria mban zgjedhjet e para parlamentare pas rrëzimit të Assad-it
Të dielën, Siria mbajti zgjedhjet e para parlamentare, gati një vit pas rebelimit të papritur që rrëzoi presidentin afatgjatë Bashar al-Assad në dhjetor.
Forcat e sigurisë u dislokuan përreth qendrave të votimit në të gjithë vendin. Anëtarët e kolegjit elektoral hynin në kabinat e votimit për të plotësuar fletët e votimit, të cilat më pas vendoseshin në kuti të vulosura dhe numëroheshin në prani të kandidatëve, gazetarëve dhe vëzhguesve nga dhoma e avokatëve të Sirisë.
Megjithatë, zgjedhjet nuk përfshinë votim të drejtpërdrejtë nga qytetarët sirianë.
Stuhia Amy lë tre të vdekur dhe dëme të mëdha në infrastrukturë në Europën Veriore
Kushtet atmosferike nisën të përmirësohen lehtë në Europën Veriore të dielën, pasi tre persona humbën jetën gjatë fundjavës kur stuhia Amy goditi rajonin me erëra të fuqishme dhe reshje shiu, duke shkaktuar dëme në infrastrukturën kritike dhe ndërprerje të energjisë për dhjetëra mijëra banorë.
Autoritetet në Holandë hoqën paralajmërimin kombëtar "kod i verdhë", pasi Amy shkaktoi anulimin e qindra fluturimeve dhe shërbimeve me traget. Ndërkohë në Skoci, autoritetet rivendosën energjinë për rreth 67,000 shtëpi, dy ditë pasi stuhia solli dëme të mëdha dhe ndërprerje të shumta.
Më herët, dy burra raportohet se humbën jetën në Francë për shkak të stuhisë, sipas autoriteteve lokale të shtunën, ndërsa në Irlandë një burrë vdiq në Letterkenny të premten në një incident që policia e cilësoi si të lidhur me kushtet e motit.
