Keith David ka ndarë emocionet dhe reagimin e tij të parë pasi u njoftua se do të marrë një yll në “Hollywood Walk of Fame” në vitin 2026.
Aktori i njohur 69-vjeçar, tre herë fitues i çmimit Emmy, i cili është mjaft i dashur nga publiku për dublimin që u ka bërë shumë personazheve të njohur, përfshirë Dr. Facilier nga filmi “Princesha dhe Bretkosa”, u përfshi zyrtarisht në listën e figurave që do të nderohen me një yll prestigjioz në Bulevardin e Famës në Hollywood.
Përmes një postimi në Instagram, ai ndau disa nga mendimet dhe ndjenjat e tij, duke përfshirë edhe një video që dokumenton momentin kur mori vesh lajmin e bukur.
"Çfarë surprize! Të jem i bekuar që bëj këtë profesion është më se e mjaftueshme për mua. Por të njihem për kontributin tim në art, është qershia mbi tortë," shkroi David.
"Faleminderit, për këtë nder!
Do të jetë një dhuratë e mrekullueshme për ditëlindjen time vitin e ardhshëm."
View this post on Instagram
Në videon e shpërndarë, aktori shihet duke parë listën e të nderuarve për vitin 2026.
Ai mbetet pa fjalë kur dëgjon emrin e tij dhe, i kapluar nga emocionet, thotë: “O Zot i madh.” Më pas shpërthen në lot gëzimi, ndërsa bashkëshortja e tij, Dionne Lee Williams, e përqafon dhe i jep një puthje të ngrohtë.
