Pjesë e filmit “Falco” të Bes Kallakut, përpos aktorëve si Arben Derhemi, Albano Bogdo apo Olsi Bylyku, do të jenë edhe personazhe të njohur, si Bleona për shembull. U përfol nëpër media se në “Falco” do të luanin Blendi Fevziu dhe Luana Vjollca. Mirëpo në një intervistë për “Edicioni Veror” në ABC News, Kallaku e mohoi një gjë të tillë.
“Jo nuk është e vërtetë,” u shpreh ai. “Do të kisha dashur t’i kisha në film, patjetër. I kam kontaktuar të dy, sepse kur nisesh të bësh një projekt kontakton 10-15 [njerëz] dhe përpiqesh të gjesh kush është i lirë pasi tani është tepër e vështirë të koordinosh datat me secilin gjatë periudhës së verës.”
Besi zbuloi gjithashtu një pjesë të subjektit të “Falco”, një komedi që sipas tij “do të jetë komedia më e bukur shqiptare që është bërë që nga vitet ’90 e këtej.”
Ai tha se subjekti bazohet te Falco ose Skifteri – një personazh që jeton në Itali. Krejt papritur, pasi opozita dorëzon mandatet, Falcos i vjen njoftimi se i takon mandati i deputeti. “Është një parodizim i gjithë gjendjes aktuale, sociale dhe politike që po kalon Shqipëria.”
Përsa i përket vendeve, komedia është xhiruar në 15 qytete shqiptare dhe do të xhirohet edhe në 3 ose 4 qytete të Italisë.
